ბარბადოსის პარლამენტმა მხარი დაუჭირა კონსტიტუციაში შესწორებას, რომლის თანახმად, დიდი ბრიტანეთის დედოფალი ელისაბედ მეორე ამიერიდან აღარ იქნება კარიბის ქვეყნის მონარქი. იუწყება სააგენტო EFE.

ცვლილებას დეპუტატებმა მხარი ერთხმად დაუჭირეს. 30 ნოემბერს ბრიტანეთისგან დამოუკიდებლობის 55-ე წლისთავზე ბარბადოსი მმართველობის მონარქიულ ფორმას რესპუბლიკურით შეცვლის.

ბარბადოსის პრემიერ მია მოტლის თქმით, მოლაპარაკებები რესპუბლიკურ მმართველობაზე გადასვლის შესახებ ჯერ კიდევ 20 წლის წინ დაიწყო.  

კონსტიტუციაში ცვლილება გულისხმობს მხოლოდ სახელმწიფოს სტატუსის შეცვლას და ელისაბედ მეორისამდი მორჩილებაზე უარის თქმას, ძირითადი კანონი კი უცვლელი დარჩება.

მომავალში დაინიშნება ბარბადოსის პრეზიდენტის არჩევნებიც. ბარბადოსზე 280 ათასამდე ადამიანი ცხოვრობს. კარიბის სახელმწიფომ დიდი ბრიტანეთისგან დამოუკიდებლობა 1966 წელს მიიღო, თუმცა შეინარჩუნა ბრიტანეთის მონარქიასთან ფორმალური კავშირი.