დაავადებთა კონტროლისა და საზოგადოებრივი ჯანმრთელობის ეროვნული ცენტრის დირექტორის, ამირან გამყრელიძის განცხადებით, ეპიდემიოლოგიური მაჩვენებლების გათვალისწინებით, საქართველო წითელ ზონაში გადავიდა, რაც განგაშის საფუძველია.

მისივე თქმით, მოსალოდნელია რიგი გამკაცრებები, უპირველესად აღსრულებასთან მიმართებაში.

უწყებათაშორისი საკოორდინაციო საბჭოს დღევანდელი სხდომის შემდეგ გამართულ ბრიფინგზე ამირან გამყრელიძემ მიანიშნა, რომ ღია სივრცეში შეკრებისას პირბადის გამოყენება სავარაუდოდ, კვლავ სავალდებულო გახდება.

"მოშვებულია მოსახლეობა. პირბადის ტარება იგივე დახურულ სივრცეებშიც აღარ მიმდინარეობს და დღეს იქნა გადაწყვეტილება, რომ იგივე ღია სივრცეებში დაწესდეს - პირბადესთან მიმართებაში ჩვენ ვიძლეოდით რეკომენდაციას, რომ ღია სივრცეებში, სადაც იკრიბება გარკვეული რაოდენობა ადამიანების, ან არის კოლექტიური შეკრებები, აუცილებელი ყოფილიყო პირბადის ტარება - დღეს ამის შესახებ გადაწყვეტილება არის, შტაბი დაამუშავებს ამ საკითხს და ალბათ, შესაბამისი ცვლილებები შევა განკარგულებაში პირბადის ხმარებასთან მიმართებაში ღია სივრცეებში, სადაც გარკვეული რაოდენობა ადამიანების შეიკრიბება", - აღნიშნა გამყრელიძემ.