დაავადებათა კონტროლისა და საზოგადოებრივი ჯანმრთელობის ეროვნული ცენტრის გენერალური დირექტორის, ამირან გამყრელიძის განცხადებით, "ფაიზერის" ვაქცინის საქართველოში შემოსვლა ეტაპობრივად ივლისის მეორე ნახევრიდან დაიწყება. ამის შესახებ გამყრელიძემ ჟურნალისტებისთვის გამართულ ვებინარზე განაცხადა.

მისი განცხადებით, მას აქვს წინასწარი ინფორმაცია, "ფაიზერის" შემოსვლის თარიღის შესახებ, მაგრამ ჯერჯერობით ვერ ასახელებს, ხელშეკრულების კონფიდენციალობის გამო.

როგორც გამყრელიძე იუწყება, ვაქცინის დოზები ქვეყანაში ეტაპობრივად შემოვა და ფარმაცევტული კომპანია დააკვირდება, როგორი იქნება ვაქცინაციის ტემპები და დოზების ათვისება.

გამყრელიძის განცხადებით, სწორედ დოზების ათვისებასთან იქნება დაკავშირებული ვაქცინის შემდგომი ეტაპების შემოსვლა.

მისივე თქმით, შესაძლოა ფაიზერით ვაქცინაცია დაიწყოს 16 წლიდან მოზარდებშიც. დაავადებათა კონტროლის ცენტრი ამ წინადადებით იმუნიზაციის საბჭოს მიმართავს, რომელიც გადაწყვეტს აიცრებიან თუ არა ამ ასაკობრივ კატეგორიაში მყოფები მოქალაქეები.