იტალიაში ქართველ ემიგრანტს ეძებენ. 42 წლის თემურ მოსაშვილის ახლოლებლები ამბობენ, რომ მამაკაცი იტალიაში სამუშაოდ იყო წასული. მისი კვალი 20 ივნისის შემდეგ იკარგება.

თემურ მოსაშვილი ლაგოდეხიდან არის და სამხრეთ იტალიაში დაახლოებით 2 თვის წინ წავიდა, თუმცა არ მუშაობდა და ამ პერიოდის განმავლობაში ქალაქ ლეჩეში, ლტოლვილთა თავშესაფარში ცხოვრობდა.

როგორც რადიო თავისუფლებას დაკარგულის დედამ, ფატი ქევხიშვილმა განუცხადა, თემურს ინსულტი განუვითადა და საავადმყოფოში მოხვდა, თუმცა იქიდან გაიპარა და გაუჩინარდა.

„ლტოლვილებს სპეციალური უფასო ავტობუსი ემსახურებოდა, თუმცა დაახლოებით 10 დღის წინ მას სიცხემ აუწია და ამ მიზეზით ტრანსპორტში აღარ შეუშვეს. 2 დღე-ღამის განმავლობაში ეძინა პარკში. მას თან ჰქონდა გიტარა, მობილური და სხვა პირადი ნივთები. ყველაფერი დაუკარგავს. ნერვიულობის ფონზე ინსულტი განუვითარდა. ამის თქმა თავად მოასწრო, შემდეგ საავადმყოფოში მოხვდა, თუმცა ის იქიდან გამოპარულა. სწორედ ამის შემდეგ არ გვაქვს მასთან კონტაქტი“, - თქვა ფატი ქევხიშვილმა. მას ეს ინფორმაცია, იტალიაში საქართველოს საელჩოდან მიაწოდეს. ასევე უთხრეს, რომ ძებნის სამუშაოები მიმდინარეობს.