რუსთაველის ეროვნული თეატრის სამხატვრო ხელმძღვანელი რობერტ სტურუა მოსკოვში გაემგზავრა. აეროპორტში სტურუამ ჟურნალისტებს უთხრა, რომ მოსკოვში წინასწარ, ფესტივალის დაწყებამდე მიემგზავრება, რათა ნახოს, რა მდგომარეობაშია სცენა, რომელზეც დასმა უნდა ითამაშოს.

"წინასწარ მივდივარ სცენა, რომ ვნახო როგორ მდგომარეობაშია, სადაც მსახიობები ჩამოვლენ 27-ში და უნდა ითამაშონ. მე იცი რა მაკვირვებს, ჩვენზე რატომ გაქვთ ასეთი აღგზნება და როცა ჩამოდიან რუსული თეატრები, მაშინ რაღაც ძალიან ტაშით ხვდებით.

ხელოვნებას არა აქვს საზღვარი. მივდივარ ხელოვნების საჩვენებლად, თუ რას აკეთებს საქართველო მაშინაც კი, როცა ასეთ სავალალო მდგომარეობაში ჩააყენა რუსებმა," - განაცხადა სტურუამ ჟურნალისტებთან საუბრისას.

რუსთაველის ეროვნული თეატრი 2021 წელს, ჩეხოვის სახელობის საერთაშორისო თეატრალურ ფესტივალზე (მოსკოვი) წარადგენს რობერტ სტურუას სპექტაკლს "თამაშის დასასრული". სპექტაკლი წარმოდგენილი იქნება 30 ივნისს და 1, 2 ივლისს.

რუსთაველის თეატრის დასის მოსკოვში გამგზავრების ცნობას უარყოფითად შეხვდა საზოგადოების დიდი ნაწილი, რომელთაც გააკრიტიკეს ეროვნული თეატრის დასის ოკუპანტ ქვეყანაში ჩასვლა. საზოგადოების ნაწილი კი მიესალმება ამ გადაწყვეტილებას და აცხადებს, რომ "პოლიტიკა და კულტურა უნდა გაიმიჯნოს".