ევროპული საბჭოს პრეზიდენტთან, შარლ მიშელთან შეხვედრის შემდეგ სტრატეგია აღმაშენებლის ლიდერმა, გიორგი ვაშაძემ თქვა, რომ შეხვედრაზე განხილულ იქნა რამდენიმე მნიშვნელოვანი საკითხი.

" ძალიან სერიოზული განაცხადი იყო ფასილიტაციიდან მედიაციის საფეხურზე გადასვლა, რაც გულისხმობს იმას, რომ მოლაპარაკებების პროცესში კონკრეტულ წინადადებებს ევროკავშირის მხარეც წარმოადგენს იმისთვის, რომ მის ასოცირებულ წევრ ქვეყანაში პოლიტიკური კრიზისი მოგვარდეს"- აღნიშნა ვაშაძემ.

მისივე თქმით, გამონდა, რომ ევროკავშირის განცდაა საქართველოში საბოლოოდ დაიხუროს პოლიტპატიმრების საკითხი.

"დავინახე, რომ პოლიტიკური პატიმრების საკითხი ამ ქვეყანაში ერთხელ და სამუდამოდ უნდა დაიხუროს. ეს არის ევროკავშირის განცდა. არ არის ნორმალური გარემო, როცა ასეთი რამ ხდება ქვეყანაში. დიდი მადლობა მათ ამ პოზიციისთვის. დარწმუნებული ვარ, რომ ამ კუთხით სერიოზული წინსვლა გვექნება". - თქვა ვაშაძემ.

სტრატეგია აღმაშენებელის ლიდერმა ასევე თქვა, რომ შარლ მიშელმა ოპოზიციას კომპრომისი სთხოვა, პარტიებმა კი შესთავაზეს პლებისციტი რიგგარეშე არჩევნების შესახებ, უშუალოდ არჩევნების მოთხოვნის ნაცვლად.

"გვთხოვეს, რომ უნდა ვიყოთ კომპრომისულები. კომპრომისად ვთქვით რიგგარეშე არჩევნების ნაცვლად შეგვიძლია წავიდეთ პლებისციტზე. ჩემი აზრით, ეს ფუნდამენტური და დიდი კომპრომისია, რომელიც ოპოზიციას გაცხადებული აქვს. შევხედოთ,რა გზით წავა მოლაპარაკების პროცესი", - განაცხადა ვაშაძემ.