აშშ-ის პრეზიდენტმა ჯო ბაიდენმა განაცხადა, რომ შეერთებული შტატები ყირიმს რუსთის ნაწილად არასდროს აღიარებს. ბაიდენის განმარტებით, ვაშინგტონი გააგრძელებს მუშაობას უკრაინაში განხორციელებული აგრესიის გამო რუსეთს პასუხისმგებლობა დაეკისროს.

„ამ სევდიან წლისთავზე ჩვენ ვიმეორებთ მარტივ ჭეშმარიტებას: ყირიმი უკრაინაა. აშშ არასდროს აღიარებს ყირიმს რუსეთის ნაწილად, უკრაინასთნ ერთად წინ აღვუდგებით რუსეთის აგრესიულ ქმედებებს. გავაგრძელებთ მუშაობას იმისათვის, რომ რუსეთმა პასუხი აგოს უკრაინაში ჩადენილი უკანონობასა და აგრესიისთვის“, - აღნიშნულია თეთრი სახლის განცხადებაში.

ჯო ბაიდენი ამ განცხადებით რუსეთის მიერ ყირიმის ანექსიის მეშვიდე წლისთავს გამოეხმაურა.

აშშ-ის პრეზიდენტის თქმით, რუსეთმა შვიდი წლის წინ დაარღვია საერთაშორისო სამართალი, ნორმები, რომლის მეშვეობითაც თანამედროვე ქვეყნები ერთმანეთთან თანამშრომლობენ. ასევე დაარღვია მეზობელი უკრაინის  სუვერენიტეტი და ტერიტორიული მთლიანობა.