საქართველოს 1.7 მლნ მოქალაქე კორონავირუსის საწინააღმდეგო ვაქცინით მიმდინარე წლის ბოლომდე აიცრება, აცხადებს ჯანდაცვის მინისტრის მოადგილე თამარ გაბუნია. მისი განმარტებით, ვაქცინაცია წლის პირველ კვარტალში დაიწყება. საწყის ეტაპზე სამედიცინო პერსონალი აიცრება, რასაც შემდგომ სხვა რისკ ჯგუფების აცრა მოჰყვება.

„პირველი ყველაზე მაღალი რისკის სამიზნე ჯგუფი გახლავთ ჯანდაცვის სექტორის მუშაკები, სამიზნე მოსახლეობა ჯამურად ამ ჯგუფის არის 71 ათასი, მოცვის მაჩვენებლი 65%. ჩვენი მიზანი იქნება 46 ათასი ჯანდაცვის მუშაკი აიცრას პირველივე ეტაპზე ძალიან მალე და ეს იქნება მაღალი ალბათობით ამ წლის პირველი კვარტალი.

ამას შემდეგ მოყვება ხანგრძლივი მოვლის დაწესებულებების ბენეფიციარები და პერსონალი - ხანდაზმულთა სახლები, პანსიონატები, ფსიქიკური ჯანმრთელობის ცენტრები. ეს სამიზნე ჯგუფი დიდი არ არის, სულ 2600-ია მოსახლეობის რაოდენობა და 60%-იან მოცვაზეა განსაზღვრული.

შემდეგ ასაკობრივი ჯგუფები, 75 წელს ზემოთ პირები, 65-დან 74 წლამდე პირები. ესენი არიან ყველა პირველი ჯგუფის ბენეფიციარები. ასევე ესენციური, ანუ ძირითადი სერვისების მიმწოდებლები, საუბარია, სტრატეგიული მნიშვნელობის სერვისებზე, რომელთა შეუფერხებელი ფუნქციონირება კრიტიკულად მნიშვნელოვანია ქვეყნისთვის, მათ შორის, პოლიცია, ჯარი და სხვა სტრატეგიული სერვისები.

ამის შემდეგ მოდის, ნაკლებად რისკის მქონე ჯგუფები 55-დან 64 წლის ფარგლებში. რაც შეეხება უფრო ახალგაზრდა პირებს, აქ გამოყოფილია ქრონიკული დაავადებების ჩამონათვალი, რომელიც იქნება ჩვენება ვაქცინაციისთვის. ჩამონათვალი ძალიან ამომწურავი და ყოვლისმომცველია", - განაცხადა გაბუნიამ.