ევროკავშირი რუსი ოპოზიციონერის ალექსეი ნავალნის, რომელიც ცოტა ხნის წინ, მოსკოვში, შერემეტევოს აეროპორტში დააკავეს, დაუყოვნებლივ გათავისუფლებას მოითხოვს.

აღნიშნულის შესახებ ევროკავშირის საბჭოს პრეზიდენტმა, შარლ მიშელმა განაცხადა.

მისი განცხადებით, ალექსეი ნავალნის დაკავება მიუღებელია და რუსეთის ხელისუფლებისგან მისი გათავისუფლება მოითხოვა.

დაკავებამდე აეროპორტში ნავალნიმ ჟურნალისტებს უთხრა, რომ ეს მისთვის საუკეთესო დღეა ბოლო ხუთი თვის განმავლობაში. მისი თქმით, ის ბედნიერია რუსეთში დაბრუნებით და სრულებით არ ეშინია დაპატიმრებისა და დევნის.

რუსეთის სასჯელაღსრულების ფედერალურმა სამსახურმა დაადასტურა ინფორმაცია, რომ ალექსეი ნავალნი სამართალდამცველებმა დააკავეს.

ალექსი ნავალნიმ რუსეთში დაბრუნების განზრახვის შესახებ 13 იანვარს განაცხადა.

12 იანვარს რუსეთის სასჯელაღსრულების ფედერალურმა სამსახურმა სასამართლოს ალექსეი ნავალნისთვის პირობითი სასჯელის რეალური განაჩენით შეცვლის მოთხოვნით მიმართა.

ნავალნის პირობითი სასჯელი და გამოსაცდელი ვადა „ივ როშეს“ საქმესთან დაკავშირებით ჰქონდა შეფარდებული.

ალექსეი ნავალნი გასული წლის აგვისტოში მოწამლეს ნერვული აგენტი "ნოვიჩოკით". ის სამკურნალოდ ბერლინში გადაიყვანეს, სადაც ექიმებმა მოახერხეს მისი გადარჩენა. კრემლმა არაერთხელ უარყო რაიმე სახის მონაწილეობა მის მოწამვლაში.

რუსეთის პრეზიდენტმა ვლადიმირ პუტინმა ყოველწლიურ პრესკონფერენციაზე განაცხადა, რომ ოპოზიციონერი პოლიტიკოსი ალექსეი ნავალნი "აშშ-ის სპეცსამსახურების მხარდაჭერით სარგებლობს" და დასძინა, რომ "რუსეთის სპეცსამსახურებს ნავალნის მოკვლა რომ ნდომოდათ, საქმეს ბოლომდე მიიყვანდნენ".