თურქეთის პრეზიდენტი ევროკავშირს მოუწოდებს Brexit-ის შემდეგ ორგანიზაციაში თურქეთი მიიღოს.

„ჩვენ უარი არ გვითქვამს ევროკავშირში სრულუფლებიანი წევრობისკენ სწრაფვაზე. მზარდი გაურკვევლობა, რომელიც Brexit -მა მოიტანა, მხოლოდ მას შემდეგ აღმოიფხვრება, რაც თურქეთი კავშირში გაწევრიანდება“, - განაცხადა ერდოღანმა ანკარაში სიტყვით გამოსვლისას.

თურქეთმა 1963 წელს ხელი მოაწერა შეთანხმებას ევროკავშირთან ასოციაციის შესახებ, 1987 წლს კი განაცხადი წარადგინა კავშირში გაწევრიანების შესახებ. თუმცა ევროკავშირში მიღების შესახებ მოლაპარაკებები მხოლოდ 2005 წელს დაიწყო, ამასთან, ეს მოლაპარაკებები არაერთგზის შეწყდა სხვადასხვა უთანხმოების გამო. ამჟამად მოლაპარაკების დოსიეს 35 თავიდან 16 ღიად რჩება. 2016 წლის მარტში ბრიუსელმა გააქტიურა მოლაპარაკებები თურქეთის მხრიდან ევროპაში მიგრანტების ნაკადის შეჩერებაზე თანხმობის სანაცვლოდ.