აშშ-ის მოქმედმა პრეზიდენტმა დონალდ ტრამპმა რესპუბლიკური პარტიის წარმომადგენლებს მოუწოდა სენატში საპრეზიდენტო არჩევნების შედეგებისთვის სენატში იბრძოლონ.

 „დროა, სენატორები რესპუბლიკური პარტიიდან გააქტიურდნენ და პრეზიდენტობისთვის იბრძოლონ, როგორც გააკეთებდნენ ამას დემოკრატები, სინამდვილეში რომ მოეგოთ საპრეზიდენტო არჩევნები. მტკიცებულებები უტყუარია!“ - დაწერა ტრამპმა Twitter-ზე.

როგორც ტრამპი ამბობს, არჩევნებზე „მერყევ“ შტატებში მოხდა ფოსტით ხმის მიცემის დროს ბიულეტინების „მასშტაბური ჩაყრა“, ორმაგი ხმის მიცემის შემთხვევები, სიებში გარდაცვლილი ამომრჩევლების გაჩენა, გაყალბებული ხელმოწერები, ხმების რაოდენობის შეუთავსებლობა ამომრჩეველთა რიცხვთან და სხვა უამრავი დარღვევა.

ტრამპი ასევე ამბობს, რომ მოსამართლეები, გამოძიების ფედერალური ბიურო და მართლმსაჯულების ორგანოები „თავიანთ სამუშაოებს არ ასრულებენ“. მისი თქმით, აშშ-ის საარჩევნო სისტემა „გამოიყურება ისე, როგორც მესამე მსოფლიოს ქვეყნების სისტემა“.

აშშ-ში საპრეზიდენტო არჩევნები 3 ნოემბერს გაიმართა. კენჭისყრაში ყოფილმა ვიცე-პრეზიდენტმა ჯო ბაიდენმა გაიმარჯვა, თუმცა მოქმედი პრეზიდენტი დონალდ ტრამპი დამარცხებას არ აღიარებს. გამარჯვებულს კონგრესი ოფიციალურად 6 იანვარს გამოაცხადებს. ინაუგურაცია 20 იანვარს გაიმართება.

ფოტო: Reuters