დეკანოზი ილია ჭიღლაძე სოციალურ ქსელში პრეზიდენტ სალომე ზურაბიშვილის საშობაო მილოცვას ეხმიანება. ზურაბიშვილმა ქრისტეშობა კათოლიკეებს მიულოცა, იმის მიუხედავად, რომ 25 დეკემბერს ქრისტეშობას პროტესტანტები და მართლმადიდებლური ეკლესიების უმრავლესობა, 10 ავტოკეფალიური ეკლესია ზეიმობს.

დეკანოზი წერს, რომ პრეზიდენტმა კიდევ ერთი სამარცხვინო რამ ჩაიდინა და პროტესტანტები და მართლმადიდებლები უგულებელყო.

"საქართველოს პრეზიდენტმა კიდევ ერთი სამარცხვინო რამ ჩაიდინა-წამოროშა (აბა სხვა რა ვუწოდო?!) და 25 დეკემბერი მარტო კათოლიკურ სამყაროს მიულოცა, პროტესტანტული ქვეყნები და მოსახლეობა დააიგნორა, მსოფლიოს მილიონობით მართლმადიდებელი საბერძნეთიდან დაწყებული რუმინეთ-ბულგარეთით დასრულებული უგულვებელყო, რა ღმერთი გაგიწყრა: ბავშვობიდან რომ გაიზარდე და მრევლი გერქვა პარიზის წმ ნინოს ქართული ეკლესიის, რომელიც კონსტანტინოპოლის მსოფლიო საპატრიარქოს ემორჩილება, 25 დეკემბერს არ აღნიშნავდით ახალი სტილით შობას და დღემდე ასე არაა ამ ეკლესიაში?! კათოლიკური ეკლესიის მრევლი იყავი?! ეს რა ამნეზია გჭირს, თუ რა მავნებლობაა?!

p.s. ტვიტერზე გამოასწორა მერეო, მის ფეისბუკზე ისევ ისეა პირვანდელი სახით ამ წუთასაც". – წერს დეკანოზი.