ერევანში საპროტესტო აქციის მონაწილეებმა სომხეთის პრემიერ მინისტრ ნოკოლ ფაშინიანს ულტიმატუმი წაუყენეს და მისი გადადგომა მოითხოვეს.

 „ფაშინიანს ვაძლევთ დროს გადადგომისთვის, ასევე მოვითხოვთ პარალმენტის რიგგარეშე სხდომის მოწვევას ამ საკითხთან დაკავშირებით“, - განაცხადა სომხეთის ოპოზიციური პარტიის „დაშნაკწუთუნის“ ლიდერმა იშხან საგათელიანმა.

მისი თქმით, წინააღმდეგ შემთხვევაში ოპოზიციის წარმომადგენლები 00:30 საათზე გამართავენ პრესკონფერენციას, სადაც გადაწყდება ფაშინიანის გადადგომის საკითხი მომდევნო დღის ბოლომდე.

როგორც საგათელიანმა აღნიშნა, ოპოზიციის წარმომადგენლებს არ სურთ დაძაბულობა, თუმცა დარწმუნებულნი არიან, რომ მოქალაქეები მათი მოწოდებისთანვე აქციებე გავლენ და მთელი ქვეყნის მასშტაბით დაუმორჩილებლობას გამოაცხადებენ. მან ხელისუფლება გააფრთხილა არ დაუშვან ოპოზიციონერების დაკავება, რაც, მისი თქმით, ძალიან ძვირი დაუჯდებათ.

ოპოზიციური პარტიის წარმომადგენლები და მათი მხარდამჭერები დღის განმავლობაში თავისუფლების მოედანზე და პარლამენტის წინ აქციებს მართავდნენ, სადაც სხვა შეძახილებთან ერთად სკანდირებდნენ „ნიკოლი მოღალატეა“.

ნიკოლ ფაშინიანმა რუსეთის პრეზიდენტ ვლადიმირ პუტინთან და აზერბაიჯანის პრეზიდენტ ილჰამ ალიევთან ერთად ხელი მოაწერა ყარაბაღში ომის დასრულების შესახებ შეთანხმებას.

დოკუმენტის პირველი სამი პუნქტის თანახმად:

1. 10 ნოემბერს, მოსკოვის დროით 00:00 საათიდან მთიანი ყარაბაღის კონფლიქტის ზონაში სრულად წყდება ცეცხლი და ყველა სამხედრო მოქმედება და აზერბაიჯანი და სომხეთი ჩერდებიან დაკავებულ პოზიციებზე;

2. აღდამის რაიონი და სომხური მხარის მიერ გაზახის რაიონში დაკავებული ტერიტორიები აზერბაიჯანს უბრუნდება 2020 წლის 20 ნოემბრამდე;

3. გამყოფი ხაზის და ლაჩინის დერეფნის გასწვრივ განთავსდება რუსეთის სამშვიდობო კონტინგენტი;

ამავე შეთანხმებით, 2020 წლის 15 ნოემბრამდე სომხეთი აზერბაიჯანს უბრუნებს კელბაჯარის რაიონს და 1 დეკემბრამდე ლაჩინის რაიონს და იტოვებს ლაჩინის 5 კილომეტრიან დერეფანს, რომელიც უზრუნველყოფს მთიანი ყარაბაღის კავშირს სომხეთთან, თუმცა არ შეეხება ქალაქ შუშას. იძულებით გადაადგილებული პირები და დევნილები ბრუნდებიან მთიანი ყარაბაღის ტერიტორიაზე და მის მიდებარე რაიონებში გაეროს ლტოლვილთა უმაღლესი კომისარიატის კონტროლით.

მთიანი ყარაბაღისთვის ინტენსიური საბრძოლო მოქმედებები 27 სექტემბრიდან განახლდა. ამ პერიოდში აზერბაიჯანმა კონტროლი აღადგინა არაერთ რაიონზე. სულ ბოლოს, 9 ნოემბერს ქალაქ შუშაზე.