დონალდ ტრამპმა განაცხადა, რომ საპრეზიდენტო არჩევნებში გამარჯვების აღსანიშნავად ემზადება.

მოქმედი პრეზიდენტის თქმით, ის დემოკრატების კანდიდატს ჯო ბაიდენს იმ შტატებში უგებს, სადაც ამას არავინ ელოდა: კერძოდ - ოჰაიოს, ტეხასის, ფლორიდის, ჯორჯიისა და ჩრდილოეთ კაროლინას შტატებში.

„დღეს ფენომენალური შედეგები გვაქვს. ჩვენ ვემზადებოდით ამ არჩევნებში გამარჯვებისთვის და სიმართლე გითხრათ, არჩევნები მოგებული გვაქვს. ჩვენ მილიონობით ადამიანმა მოგვცა ხმა. ყველა ეს შტატი არც კი გვჭირდება მოსაგებად“, - განაცხადა ტრამპმა თეთრ სახლში გამოსვლისას.

აშშ-ის საპრეზიდენტო არჩევნები 3 ნოემბერს გაიმართა. ზოგიერთ შტატში ხმის მიცემის პროცესი ჯერ კიდევ მიმდინარეობს. ქვეყანაში 46-ე პრეზიდენტს ირჩევენ. ტრამპის მეტოქე დემოკრატების კანდიდატი ჯო ბაიდენია.  ამჟამად ხმების დათვლა მიმდინარეობს. ამერიკელები პრეზიდენტს ირჩევენ არა პირდაპირ, არამედ შტატების მცხოვრებთა რაოდენობის პროპორციულად დაკომპლექტებული 538-წევრიანი საარჩევნო კოლეგიის მეშვეობით. არჩევნებში გასამარჯვებლად პრეზიდენტობის კანდიდატს სჭირდება სულ მცირე 270 ხმა

ტელეარხ Fox News-ს ინფორმაციით, ჯო ბაიდენს საარჩევნო კოელგიის წევრთა 238 ხმა აქვს, ტრამპს კი 213. ზოგიერთ შტატში შედეგები ჯერ დათვლილი არ არის, ამიტომ რომელიმე კანდიდატის ლიდერობაზე საუბარი ჯერ ადრეა.