ევროკავშირის ქვეყნების საგარეო საქმეთა მინისტრებმა დაადასტურეს, რომ ალიაქსანდრ ლუკაშენკას ბელარუსის ლეგიტიმურ პრეზიდენტად არ აღიარებენ. ამის შესახებ ევროკავშირის საგარეო საქმეთა მინისტრების მოლაპარაკებების შემდეგ საგარეო პოლიტიკისა და უსაფრთხოების საკითხებში ევროკავშირის უმაღლესმა წარმომადგენელმა ჯოზეფ ბორელიმ განაცხადა.

სხდომის დაწყებამდე მან აღნიშნა, რომ ბელარუსში ვითარება უარესდება.
„სამწუხაროდ, სიტუაცია უარესდება და მშვიდობიანი აქტივისტების რეპრესიები გრძელდება. ამის ნახვა ტელევიზიით ყველას შეუძლია. დღეს ჩვენ განვიხილავთ, როგორ უნდა დავუჭიროთ უკეთ მხარი ბელარუს ხალხს და როგორ გადავხედავთ ჩვენს ურთიერთობებს ბელარუსის მთავრობასთან იმის გათვალისწინებით, რომ ჩვენ ლუკაშენეკას ლეგიტიმურ პრეზიდენტად არ ვაღიარებთ“, – განაცხადა ბორელიმ.

„ჩვენი მონაცემებით, არჩევნები იყო გაყალბებული. ამიტომ არ ვაღიარებთ ლუკაშენკას ქვეყნის პრეზიდენტად“, - განაცხადა ბორელიმ შეხვედრის შემდეგ.