„სუროგაციის ინსტიტუტი, რომელიც 2012 წელს ნაციონალურმა მოძრაობამ შემოიტანა, რეგულაციების არარსებობის გამო, ტრეფიკინგის ღია წყარო იყო“, - განაცხადა საქართველოს იუსტიციის მინისტრმა თეა წულუკიანმა.

მისი თქმით, მარტოხელა მშობელს სუროგაციის უფლება არასდროს ჰქონია და ეს დღესაც ასეა.

"როგორც არ იყო მარტოხელა მშობლისთვის სუროგაცია 2012 წლის აპრილში შესაძლებელი, ისე არ არის ეს დღეს“, - აღნიშნა მინისტრმა.

მისივე თქმით, წყვილებისთვის სუროგაცია კვლავ შესაძლებელია, თუმცა გარკვეულთ პირობებით, რათა ქვეყანაში ჩვილებით ვაჭრობა შეუძლებელი იყოს.

"ვინც არის ან უნაყოფო წყვილი, ან წყვილი რომელსაც ჰყავს შვილები, მაგრამ უნდა რომ ჰყავდეს სხვა ბავშვი სუროგაციის მეშვეობით, რა თქმა უნდა, მათთვის სუროგაცია კვლავ შესაძლებელია, მაგრამ გარკვეული დათქმებით, რათა არამხოლოდ ბავშვის, არამედ იმ სუროგატი დედის უფლებებიც იყოს დაცული. ძირითადად, ესენი არიან 100% საქართველოს მოქალაქეები, ქართველი ქალები, რომელთა მუცელს და საშვილოსნოს იყენებენ ის ადამიანები, ვინც ჩამოდიან უცხოეთიდან და სუროგაციის სერვისით საქართველოში ქართველი ქალები ემსახურებიან მოქალაქეებს რომელთა 90% არის უცხოელი. რა თქმა უნდა, ეს არ იკრძალება, მაგრამ არის მკაცრი რეგულაციები. ჩვილით ვაჭრობა ვერ იქნება დაშვებული ამ ქვეყანაში, ქალთა უფლებები უნდა იყოს დაცული ამ ქვეყანაში", - განაცხადა თეა წულუკიანმა.

თეა წულუკიანის ბრძანებით, ექსტრაკორპორული გზით განაყოფიერების სერვისით (სუროგაცია) სარგებლობა მხოლოდ იმ წყვილებს შეეძლებათ, რომლებიც ქორწინებაში ან ფაქტობრივ თანაცხოვრებაში მინიმუმ 1 წელია იმყოფებიან.

ბრძანება 2020 წლის 15 სექტემბრიდან ამოქმედდება.