ნიუ იორკის შტატში დაახლოებით 100 ბავშვი და მოზარდი დაავადდა ანთებითი სინდრომით, რომელიც სავარაუდოდ კორონავირუსთან არის დაკავშირებული, - ამის შესახებ შტატის გუბერნატორმა ენდრიუ კუომომ პრესკონფერენციაზე განაცხადა.

 „თავიდან ვფიქრობდით, რომ ეს ვირუსი არ მოქმედებს ბავშვებზე. ახლა კი გვაქვს საქმე პრობლემასთან, რომელიც გვაღელვებს. ჩვენ დაახლოებით ანთებითი დაავადების 100 შემთხვევა გვაქვს, რომელიც გამოწვეულია  COVID-19-ის ვირუსით“, - განაცხადა კუომომ.

მანამდე განაცხადა, რომ სისტემური ანთებითი სინდრომისგან, რომელიც შესაძლოა, კორონავირუსს უკავშირდებოდს, შტატში გარდაიცვალა სამი ბავშვი - 5 და 7 წლის ბიჭები და 18 წლის გოგონა.

გუბერნატორის მონაცემებით, ამ სინდრომით დაავადებული 100-მდე შემთხვევიდან 5 პროცენტი არის ერთ წლამდე ასაკის, 18 პროცენტი 1-დან 4  წლამდე, 29 პროცენტი - 5-დან 9 წლამდე, 28 პროცენტი - 10-დან 14 წლამდე, 16 პროცენტი - 15-დან 19 წლამდე და 4 პროცენტი 20-დან 21 წლამდე.

შეგახსენებთ, დიდი ბრიტანეთის ჯანდაცვის ეროვნული სისტემის (NHS) წარმომადგენლებმა ექიმებს გაუგზავნეს გაფრთხილება იმ შემთხვევების მატების შესახებ, როდესაც ბავშვები ხვდებიან რეანიმაციებში სისტემური ანთებითი სინდრომით, რომელიც იწვევს ტკივილებს მუცლისა და გულის არეში და შესაძლოა კავშირში იყო კორონავირუსთან.