ვიჩენთ სიფრთხილეს და გაწერილ პაციენტებს ორი კვირით მოვათავსებთ თვითიზოლაციაში, - ამის შესახებ თბილისის ინფექციური საავადმყოფოს დირექტორმა თენგიზ ცერცვაძემ განაცხადა.

დღეს პირველმა გამოჯანმრთელებულმა პაციენტმა თბილისის ინფექციური საავადმყოფო დატოვა. ცერცვაძის განმარტებით, საქართველოში შემუშავებული წესის თანახმად, ის 14 დღის განმავლობაში თვითიზოლაციაში იქნება.

„ჩვენთან შევიმუშავეთ ასეთი წესი – პაციენტი ორი კვირის მანძილზე იქნება თავის ბინაზე თვითიზოლაციაში, არ გავა არც სამსახურში, არც შევა სხვებთან კონტაქტში. ამის საფუძველი მოგვცა ჩინურმა გამოცდილებამ, სადაც რამდენიმე ასეული პაციენტი, რომელიც ეგონათ გაჯანმრთელებული და გაეწერა, შემდეგ აღენიშნათ ხელახლა სიმპტომები და შეაბრუნეს კლინიკებში. ჯერ არ იციან, არ იყო ბოლომდე გამოჯანმრთელება, იყო ვირუსის მტარებელი და შემდეგ შეუბრუნდა, თუ ხელახლა დაინფცირდნენ. ვიდრე ეს არ დაგვიდგენია, ვიჩენთ სიფრთხილეს და გაწერილ პაციენტებს ორი კვირით მოვათავსებთ თვითიზოლაციაში“ ,- აღნიშნა თენგიზ ცერცვაძემ.