5 დეკემბერს, საქართველოს საელჩოსა და კორეის რესპუბლიკის ეროვნული ასამბლეის კორეა-საქართველოს საპარლამენტთაშორისო მეგობრობის ჯგუფის ერთობლივი ინიციატივით, ქვეყნის უმაღლესი საკანონმდებლო ორგანოში გაიმართა წლის შემაჯამებელი ღონისძიება, სადაც პარალელურად გაიხსნა ქართული ხელნაწერების გამოფენა „ვეფხისტყაოსანი – ევროპა და აზია ერთ წიგნში" და მოეწყო ქართული ღვინის დეგუსტაცია.

ღონისძიებაზე სპეციალური სტუმრის სტატუსით მოწვეული იყო კორეის რესპუბლიკის ეროვნული ასამბლეის სპიკერი, მუნ ჰი-სან გი და 100-მდე სტუმარი, მათ შორის, ეროვნული ასამბლეის დეპუტატები და აპარატის თანამშრომლები. დამსწრე პირებს მისასალმებელი სიტყვით მიმართეს სპიკერმა მუნმა, კორეის რესპუბლიკაში საქართველოს ელჩმა, ოთარ ბერძენიშვილმა და კორეა-საქართველოს საპარლამენტთაშორისო მეგობრობის ჯგუფის თავმჯდომარემ, იუ სინგ-ჰიმ.

ელჩმა თავის გამოსვლაში ისაუბრა ორი ქვეყნის საკანონმდებლო ორგანოებს შორის ბოლო პერიოდში ჩამოყალიბებული თანამშრომლობის მზარდ დინამიკაზე და მისი გაღრმავების პერსპექტივებზე. აღნიშნა, რომ ამ მხრივ მნიშვნელოვანი იყო მიმდინარე წლის ოქტომბრის თვეში კორეის რესპუბლიკის ეროვნული ასამბლეის სპიკერის ხელმძღვანელობით, საპარლამენტო დელეგაციის ვიზიტი საქართველოში, რომელმაც კიდევ უფრო გააძლიერა პარტნიორული ურთიერთობები როგორც საპარლამენტო, ასევე აღმასრულებელ დონეზე. პარალელურად, ნაჩვენები იყო კორეული საზოგადოებრივი ტელევიზიის KBS-ის მიერ მიმდინარე წელს მომზადებული ტურისტული ვიდეო-რგოლები საქართველოს შესახებ, რამაც დამსწრე საზოგადოების დიდი ინტერესი გამოიწვია.