ხალხი, ვინც არჩევნების კონსტიტუციურ უფლებას აუქმებს და აყალბებს არჩევნებს, რა თქმა უნდა, უნდა დავამხოთ, გავწიოთ ხელისუფლებიდან, – ამის შესახებ ტელეკომპანია „მთავარის“ დირექტორმა, ნიკა გვარამიამ ჟურნალისტებთან განაცხადა.

გვარამიას თქმით, მისი „ფეისბუქის“ სტატუსი არის დამოკიდებულება და შეფასება იმისა, რასაც წარმოადგენს დღეს ხელისუფლება და ერთი ადამიანი.

„აბა, როგორ წარმოგიდგენიათ სხვანაირად. აბა, ის ნორმალურია, ადამიანებს რომ ესხმიან თავს ვიღაც გიჟები, რომლებსაც ხელს არავინ არ კიდებს. ადამიანებს სცემენ, დასდევენ, ცხოვრებას უმწარებენ და არავინ პასუხს არ სთხოვს. ლობიოს მიმოპნევისთვის ხალხი დღეების განმავლობაში ციხეშია, ეს ხომ ქვეყანა არ არის, ეს არის კლანების სათარეშო ტერიტორია. კლანების სათარეშო ტერიტორია ვისაც უნდა, ის შეეგუოს ამას, მე არ მინდა. ეს ჩემი სამშობლოა, ვარ ამ ქვეყნის დასავლური ინტეგრაციის მომხრე, ამიტომ მიმაჩნია, რომ ამ ვითარებაში, როცა ეს პრაქტიკულად გამორიცხა ბიძინა ივანიშვილმა, ის უნდა გაიწიოს“, – განაცხადა ნიკა გვარამიამ.

„ჩვენ, ქართველმა პატრიოტმა მედასავლეთეებმა, უნდა გამოვიყენოთ ქვეყნის გადარჩენის ბოლო ლეგიტიმური გზა და უზურპატორი, თავის ხუნვეიბიენებიან მანქურთებიანად, უნდა დავამხოთ”, - დაწერა „ფეისბუქში“ტელეკომპანია „მთავარი არხის“ გენერალურმა დირექტორმა ნიკა გვარამიამ.