საქართველოს პრემიერ-მინისტრი გიორგი გახარია აზერბაიჯანში ვიზიტს იწყებს. იტყობინება მთავრობის პრესსამსახური.

აზერბაიჯანი პირველი ქვეყანაა, რომელსაც გიორგი გახარია პრემიერ-მინისტრის რანგში სტუმრობს.

ბაქოში ვიზიტამდე ერთი დღით ადრე, საქართველოს საპატრიარქომ გამოაქვეყნა წერილი, სადაც ის პრემირ-მინისტრსა და საგარეო საქმეთა მინისტრს სთხოვს, მოხდეს დავით გარეჯთან დაკავშირებული სადაო საკითხების დაუყოვნებლივ გადაწყვეტა.

პრემიერ-მინისტრის პრესსამსახურის ცნობით, გიორგი გახარიას შემდეგი ვიზიტი სომხეთის რესპუბლიკაში შედგება, ხოლო თვის ბოლოს კი იგი თურქეთს ეწვევა.

გიორგი გახარიას ვიზიტი ბრიუსელში შედგება ევროკომისიაში ამჟამად მიმდინარე საკადრო საკითხების დასრულებისთანავე, როგორც კი განახლებული ევროკომისია საკუთარი უფლებამოსილების განხორციელებას შეუდგება.