აზერბაიჯანის პოლიტიკურ და სტრატეგიულ მიზანს ერევანში დაბრუნება წარმოადგენს, რომელიც აზერბაიჯანის ისტორიული ტერიტორიაა. „რია ნოვოსტის“ ინფორმაციით,  ამის შესახებ პრეზიდენტმა ილჰამ ალიევმა მმართველი პარტიის „ახალი აზერბაიჯანის“ სხდომაზე სიტყვით გამოსვლისას განაცხადა.
აზერბაიჯანის ლიდერის თქმით, ირევანის სახანო, ზანგეზური და გიოიჩე აზერბაიჯანელი ხალხის ისტორიული მიწააა. მან ასევე აღნიშნა, რომ მოცემული ფაქტი უნდა იცოდეს, როგორც ახალმა თაობამ, ისე საერთაშორისო თანამეგობრობამ.

„ერევანი ჩვენი ისტორიული ტერიტორიაა და ჩვენ, აზერბაიჯანელები უნდა დავბრუნდეთ ამ ისტორიულ მიწაზე. ეს ჩვენი პოლიტიკური და სტრატეგიული მიზანია , რომელსაც ეტაპობრივად უნდა მივუახლოვდეთ“, - განაცხადა აზერბაიჯანის ლიდერმა.

ალიევის თქმით, საერთაშორისო თანამეგობრობა მთიანი ყარაბაღის საკითხში მხარს აზერბაიჯანს უჭერს. მისივე თქმით, ყარაბაღის კონფლიქტი გაეროს უშიშროების საბჭოს რეზოლუციის საფუძველზე უნდა დარეგულირდეს.

სომხეთის ხელისუფლებამ აზერბაიჯანის პრეზიდენტის განცხადებას მიუღებელი უწოდა.