გერმანიის ყოფილი კანცლერი გერჰარდ შროდერი მეხუთედ ქორწინდება. 73 წლის პოლიტიკოსის რჩეული 48 წლის კორეელი კიმ სო იონია.

მედიის ცნობით, შროდერი დაქორწინებას შემოდგომაზე აპირებს. ექს-კანცლერის თქმით, ქორწილის ზუსტი ადგილი და თარიღი მოგვიანებით გახდება ცნობილი.

წყვილი ერთმანეთს უკვე რამდენიმე წელია ხვდება. შროდერი და კიმ სო იონი ორ ქვეყანაში - სამხრეთ კორეასა და გერმანიაში ცხოვრობს. ექს-კანცლერის რჩეული ბიზნესის განვითარების გერმანული კორპორაციის წარმომადგენლობაში მუშაობს.

შროდერის თქმით, სურვილი აქვს რომ კორეული ენა ისწავლოს და რჩეულთან ნორმალური ცხოვრება ჰქონდეს.

ამ დროისათვის ექს-კანცლერი თავის მეოთხე ცოლთან დორის შროდერ-კოპფთან განქორწინების პროცესშია. ამ ქორწინებაში შროდერს ორი აყვანილი შვილი ჰყავს. დორის შროდერ-კოპფი ქვემო საქსონიის შინაგან საქმეთა მინისტრს ბორის პისტორიუსს ხვდება.

მანამდე შროდერ-კოპფმა Facebook-ში დაწერა, რომ მისი ქმრისა და კიმ სო იონის ურთიერთობა შროდერთან განხეთქილების მთავარი მიზეზი გახდა.