მარტოხელა დედათა და ბავშვთა დაცვის ასოციაციამ - „მომავლის მზე“ მორიგი სოციალური აქცია #შეამჩნიე წამოიწყო.

როგორც ასოციაციის პრეზიდენტმა თეო ფირანიშვილმა განაცხადა, აქციის მიზანია მოიძიონ პარტნიორი კომპანიები, რომლებიც სოციალურ პასუხისმგებლობას აიღებენ და პერმანენტულად საკვებითა თუ სხვა პირველადი მოხმარების ინვენტარით უზრუნველყოფენ.

„მომავლის მზემ“ აქციის პირველი ეტაპი სამშენებლო კომპანია „დირსთან“ ერთად ჩაატარა და წინასაახალწლოდ, სხვადასხვა პროდუქტით მოამარაგა, ვაზისუბნის რაიონის მერვე ოლქში მცხოვრები მარტოხელა დედა ჟანა კუპრიაშვილი.

ასოციაციის „მომავლის მზე“ დაარსების დღიდან თანამშრომლობს საქართელოს პარლამენტის წევრი, ისნის ოლქის მერვე ლეგიონის მაჟორიტარი დეპუტატი ირაკლი აბუსერიძეც.

აქციის ფარგლებში ირაკლი აბუსერიძე, დეპუტატ ლევან დავითაშვილთან ერთად ესტუმრა ჟანა კუპრიაშვილის ოჯახს:

„დიდ მადლობას ვუხდი მარტოხელა დედათა და ბავშვთა ასოციაციას „მომავლის მზე" გვერდში დგომისთვის. აქცია #შეამჩნიე ძალიან სასარგებლო წამოწყებაა და ვიმედოვნებ, რომ მის ფარგლებში, კიდევ უფრო მეტი დაინტერესებული კერძო პირი თუ კომპანია ჩაერთვება. თითოეულმა ჩვენთაგანმა უნდა ავიღოთ, ჩვენი წილი პასუხისმგებლობა ასეთი კატეგორიის დედების მიმართ და ვეცადოთ მათი ყოფითი ცხოვრება ცოტათი მაინც გავაუმჯობესოთ“, - განაცხადა პარლამენტარმა ირაკლი აბუსერიძემ.

შეგახსენებთ, რომ აქციია #შეამჩნიე პერმანენტული ხასიათისაა და მეორე ეტაპის განხორციელება უახლოეს პერიოდში იგეგმება.