კალიფორნიის შტატის ხელისუფლებამ ტყის ხანძრის საფრთხის გამო მოსახლოების ევაკუაცია განაახლა.

ტელეარხ CBS-ის ინფორმაციით, ევაკუაცია კარპინტერიასა და მონტესიტოში მიმდინარეობს.
სახანძრო სამსახურის წარმომადგენლები მოსახლეობას საცხოვრებელი სახლების დაუყოვნებლივ დატოვებისკენ მოუწოდებენ. „დრო ევაკუაციისთვის იმ დროს არ დგება, როდესაც სახანძრო მანქანებს ვაგზავნით, ამიტომ როდესაც ჩვენ ევაკუაციის შესახებ ვიტყობინებით, სასწრაფოდ უნდა დატოვოთ თქვენი საცხოვრებელი სახლები“, - ნათქვამია სახანძრო სამსახურის განცხადებაში.

როგორც ცნობილია, შაბათს ხელისუფლებამ პირველი მსხვერპლის შესახებაც გაავრცელა ინფორმაცია.

კალიფორნიაში ტყის ხანძარი 4 დეკემბერს დაიწყო. ცეცხლის გავრცელებას ხელს უწყობს ქარიანი და მშრალი ამინდი, რომელიც სინოპტიკოსების პროგნოზის თანახმად, კვირამდე გაგრძელდება.

ბოლო მონაცემებით, შტატში უკვე 57 ათასი ჰექტარია დამწვარი. 212 ათასი ადამიანი კი ევაკუირებულია. აშშ-ის პრეზიდენტმა დონალდ ტრამპმა კალიფორნიაში საგანგებო მდგომარეობა გამოაცხადა.