საქართველოს პარლამენტის ეროვნული ბიბლიოთეკის პირველ კორპუსში წიგნის მუზეუმის გახსნას განათლების, მეცნიერებისა და კულტურის კომიტეტის თავმჯდომარე მარიამ ჯაშიდაესწრო.

როგორც ეროვნული ბიბლიოთეკის გენერალურმა დირექტორმა, გიორგი კეკელიძემ აღნიშნა, წიგნის მუზეუმი არის ბოლო ათწლეულების ყველაზე მასშტაბური პროექტი ამ სფეროში. მისი თქმით, მუზეუმი კავკასიაში უდიდესი და ევროპაში ერთ–ერთი საუკეთესოა როგორც ვიზუალური, ისე თვისობრივი თვალსაზრისით. მისივე ინფორმაციით, ეს არის ქვეყანაში დაცული ძვირფასი წიგნების პირველი მუდმივმოქმედი გამოფენა, რომელიც ოთხ ნაწილადაა წარმოდგენილი:

· საკუთრივ იშვიათი გამოცემების მუზეუმი, სადაც სიძველით და ფორმით გამორჩეული წიგნებია წარმოდგენილი – მაგალითად ქართულ-იტალიური ლექსიკონი (1629), ვახტანგის სტამბის გამოცემები, ინკუნაბულა;
· „ვეფხისტყაოსნის" მუზეუმი – აქ წარმოდგენილია პოემის ყველა გამოცემა ქართულ და უცხოურ ენებზე; 
· ილიას დარბაზი – ილია ჭავჭავაძის კაბინეტის ექსპოზიცია, მისი პირადი ნივთებითა და ბიბლიოთეკით;
 ბროსეს საცავი – ულტრათანამედროვე საცავი, აღჭურვილი შესაბამისი კლიმატ–კონტროლის აპარატურით. 

ქვეყნის მთავარი ბიბლიოგრაფიული განძის - ეროვნულ ბიბლიოთეკაში დაცული იშვიათი გამოცემებისთვის ულტრათანამედროვე საცავის და მუზეუმის გამართვა ბიზნესის თანადგომით გახდა შესაძლებელი. „ამჯერად ეროვნული ბიბლიოთეკის პარტნიორი იყო „დავით ბეჟუაშვილის განათლების ფონდი". ამ ფონდის მხარდაჭერით მოხდა იმ იდეის განხორციელება, რომელიც ჯერ კიდევ გალაკტიონმა გამოთქვა წლების წინ", - განაცხადა გიორგი კეკელიძემ.

მარიამ ჯაშმა მადლობა გადაუხადა თითოეულ ადამიანს, ვინც საუკუნეების მანძილზე დღემდე შემოინახა უდიდესი ეროვნული განძი. „ახლო წარსულში თბილისში მიმდინარე სამოქალაქო დაპირისპირების დროს ბიბლიოთეკის თანამშრომლებმა განსაკუთრებული სიყვარულით და თავდადებით შემოინახეს და დაიცვეს ჩვენი უნიკალური ექსპონატები. ჩემი დიდი სურვილია, უფრო მეტი დაფასება ჰქონდეთ იმ ადამიანებს, რომლებიც იცავენ საქართველოს ეროვნულ საგანძურებს", - განაცხადა მარიამ ჯაშმა.

მან, ასევე, მადლობა გადაუხადა ეროვნული ბიბლიოთეკის ხელმძღვანელს, გიორგი კეკელიძეს და მის თანამოაზრეებს ამ ინიციატივისთვის, იდეის მხარდამჭერს - „დავით ბეჟუაშვილის განათლების ფონდსა" და მის ხელმძღვანელს. „ეს არის საქმე, რომელიც თაობებს დარჩება თქვენი სახელით", - მიმართა მან დავით ბეჟუაშვილს.

მარიამ ჯაშს მიაჩნია, რომ კიდევ უფრო მეტად უნდა გაძლიერდეს ეროვნული ბიბლიოთეკის განსაკუთრებული როლი. „კანონის დონეზე ჩვენ უნდა მივანიჭოთ ეროვნულ ბიბლიოთეკას საბიბლიოთეკო საქმის მართვის მთავარი მეთოდური ოფისის ფუნქცია, რადგან ისეთი გამოცდილება, რომელიც ამ შენობაში და ამ დაწესებულების სხვადასხვა შენობებში არის დაგროვილი, განსაკუთრებით ბოლო პერიდში, გიორგი კეკელიძის ხელმძღვანელობის განმავლობაში, ეს არის უნიკალური და ჩვენ იგი უნდა გადავცეთ ყველა მუნიციპალიტეტში მოქმედ ბიბლიოთეკებს", - განაცხადა მარიამ ჯაშმა.