მთავრობაში განხორციელებული საკადრო და სტრუქტურული ცვლილებების შემდეგ,  გაურკვეველი რჩება 5 მაღალჩინოსნის მომავალი საქმიანობის საკიხი. კერძოდ, პრემიერ-მინისტრის მიერ გამართულ სპეციალურ ბრიფიონგზე არაფერი თქმულა იმის შესახებ, თუ სად  განაგრძობენ საქმიანობას განათლების მინისტრი, ალექსანდრე ჯეჯელავა, გარემოს დაცვის მინისტრი, გიგლა აგულაშვილი, დაზვერვის სამსახურის ხელმძღვანელი, დავით სუჯაშვილი, სახელმწიფო უსაფრთხოებისა და კრისიზების მართვის საბჭოს უფროსი, მინდია ჯანელიძე და  ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი, ვიქტორ დოლიძე.

შეგახსენებთ, ევროპულ და ევროატლანტიკურ საკითხებში სახელმწიფო მინისტრის აპარატი საგარეო უწყებას უერთდება.  ეკონომიკისა და მდგრადი განვითარების სამინისტროს უერთდება ენერგეტიკის სამინისტრო და გარემოს დაცვისა და ბუნებრივი რესურსების სამინისტროს ბუნებრივი რესურსების მართვის კომპონენტი.  განათლებისა და მეცნიერების სამინისტროს უერთდება სპორტისა და ახალგაზრდობის საქმეთა სამინისტროს ახალგაზრდობის საქმეთა მართვის კომპონენტი. 

კულტურისა და ძეგლთა დაცვის სამინისტროს უერთდება სპორტისა და ახალგაზრდობის საქმეთა სამინისტროს სპორტის კომპონენტი. 

გარემოს დაცვის სამინისტროს უერთდება სოფლის მეურნეობის სამინისტრო.  გარდა ამისა, პარლამენტს წარედგინება ცვლილება,რომლის მიხედვითაც სახელმწიფო უსაფრთხოების სამსახურს უერთდება საგარეო დაზვერვის სამსახური.  

ასევე, შინაგან საქმეთა სამინისტროში დღეს მოქმედი საგანგებო სიტუაციების მართვის სააგენტოსა და სახელმწიფო უსაფრთხოებისა და კრიზისების მართვის საბჭოს შერწყმისა და რეორგანიზაციის შედეგად, იქმნება საგანგებო სიტუაციების მართვის ცენტრი.