თბილისის ახალი მერი საკუთარ გუნდს დღეს, 15:00 საათზე წარადგენს.  თბილისის მერმა კახა კალაძემ მერიაში მისვლისას განაცხადა, რომ თავის გუნდთან ერთად,  შეძლებს იმ პრობლემების მოგვარებას, რომელიც ქალაქისთვის აქტუალურია,

"დიდ მნიშვნელობას ვანიჭებ, რომ ჩემი ქვეყნის დედაქალაქის არჩეული მერი ვარ. ამავდროულად კარგად მაქვს გათვითცნობიერებული, თუ რა პასუხისმგებლობაა, რა სამუშაო მაქვს შესასრულებელი და შესაბამისად, გუნდთან ერთად, ამ ხალხთან ერთად, ჩვენ შევძლებთ იმ პრობლემების მოგვარებას, რომელიც ქალაქისთვის აქტუალურია“,- განაცხადა კალაძემ.

თბილისის ახალი მერი საკუთარ გუნდს დღეს, 15:00 საათზე წარადგენს.

"15:00 საათისთვის წარმოგიდგენთ მოადგილეებს. ძალიან დიდი ინტერესია საზოგადოებაში. მინდა დიდი წარმატება ვუსურვო მერიას, დარწმუნებული ვარ, მართლა ბევრი მნიშვნელოვანი პროექტი განხორციელდება მომავალი ოთხი წლის განმავლობაში“,- განაცხადა კახა კალაძემ.

მედიაში გავრცელებული ცნობით, ვიცემერის თანამდებობებს დაიკავებენ ენერგეტიკის მინისტრის ყოფილი მოადგილე ირაკლი ხმალაძე, გარემოს დაცვის მინისტრის ყოფილი მოადგილე მაია ბითაძე, ასევე კალაძის გუნდის კიდევ ერთი წევრი თემურ ბოლოთაშვილი და ენერგეტიკის ყოფილი მინისტრი ილია ელოშვილი.

მომდევნო დღეებში კალაძე უკვე საქალაქო სამსახურების ხელმძღვანელებსაც დაასახელებს.