,,თუ პეტრიაშვილი მოხსნის კანდიდატურას, ამ შემთხვევაში, მეც მოვხსნი კანდიდატურას", - ამის შესახებ პროფკავშირების თავმჯდომარეობის კანდიდატმა დავით ოქიტაშვილმა ჟურნალისტებს განუცხადა.

ოქიტაშვილის განცხადებით, გაერთიანების მოქმედ თავმჯდომარეს კანდიდატურის მოხსნას პროფესიული კავშირების გაერთიანების მე-8 საანგარიშო-საარჩევნო ყრილობაზე შესთავაზებს. 

„არანაირი კანდიდატურის მოხსნას არ ვაპირებ. თუ პეტრიაშვილი მოხსნის კანდიდატურას, ამ შემთხვევაში, მეც მოვხსნი კანდიდატურას. პროფესიული კავშირების გაერთიანების მე-8 საანგარიშო-საარჩევნო ყრილობაზე ამ შეთავაზებას კიდევ ერთხელ გავაკეთებ. თანამდებობისთვის არ ვიბრძვი. ჩემი მიზანი ის იყო, რომ ხალხს დაენახა კრიმინალ პეტრიაშვილის ფეოდალური მმართველობა პროფკავშირებში, რომელიც 12 წელია გრძელდება. კიდევ ერთი კომიკური საკითხი ის არის, რომ ჩემს არც ერთ მხარდამჭერს ყრილობაზე დასწრების უფლება არ მისცეს. მე ვითხოვდი მხოლოდ ერთ მოსაწვევს, მხოლოდ ერთს - ხათუნა ხოფერიასთვის, რომელთან ერთადაც დავიწყე ბრძოლა, მაგრამ უარი მითხრეს. მე კიდევ ერთხელ შევთავაზებ პეტრიაშვილს, რომ მოხსნას კანდიდატურა. ბრძოლას კი ბოლომდე გავაგრძელებ“, - განაცხადა დავით ოქიტაშვილმა. 

შეგახსენებთ, დღეს გაერთიანებული პროფკავშირების  მე-8 საანგარიშო-საარჩევნო ყრილობა იმართება, რომელზეც გაერთიანების თავმჯდომარე უნდა აირჩიონ.

არჩევნებში სამი კანდიდატი მონაწილეობს: გაერთიანების მოქმედი თავმჯდომარე ირაკლი პეტრიაშვილი, ხელოვნების მუშაკთა პროფკავშირის თავმჯდომარე დავით ოქიტაშვილი და ენერგეტიკის მუშაკთა პროფკავშირის თავმჯდომარე ამირან ზენაიშვილი.

ადგილზე სამართალდამცველთა მობილიზება სავარაუდოდ, კანდიდატებს შორის არსებულ დაპირისპირებას უკავშირდება.