განათლების მინისტრი, ვიცე-პრემიერი ალექსანდრე ჯეჯელავა  სამინისტროს შენობასთან გუშინ გამართულ აქციას ეხმიანება და აცხადებს, რომ  სასკოლო საგან „მე და საზოგადოების“ შინაარსი შეთანხმებულია სასულიერო პირებთან.

,,მნიშვნელოვანია ამ დოკუმენტს ყველა დაინტერესებული პირი გაეცნოს. ის მასალები, რომელსაც გუშინდელ აქციაზე ავრცელებდნენ, არის რომელიღაც, ჩვენთვის უცნობი წიგნიდან, რომელიც ნამდვილად მიუღებელია.

შესაბამისად, ჩვენ ვამბობთ, რომ საზოგადოებისთვის რაც იქნება მიუღებელი, არაფერი უნდა მოხვდეს სასწავლო პროგრამაში. საგნის სწავლება დაიწყება, თუმცა ჩვენ წინასწარ ყველა ნაბიჯს გადავდგამთ, რომ არაფერი ისეთი არ იყოს ამ საგანში და სახელმძღვანელოებში, რაც იქნება მიუღებელი მოსწავლეების ოჯახებისა და მშობლებისთვის. ამ ახალი სასწავლო წლიდან ვგეგმავთ მისი სწავლების დაწყებას, თუმცა პროცესში დავაზუსტებთ ამ საკითხს“, - განმარტა მინისტრმა.

„მე და საზოგადოების“ სკოლაში სწავლება გუშინ, განათლების სამინისტროსთან გააპროტესტეს. აქციის მონაწილეები მიიჩნევენ, რომ საგანი აღსაზრდელათა გარყვნილებას შეუწყობს ხელს.