საქართველოს პრეზიდენტის ადმინისტრაციის უფროსმა გიორგი აბაშიშვილმა საქართველოს პრეზიდენტის ყოფილი ეკონომიკური მრჩეველი მაია მელიქიძე, რომელიც საქართველოს ენერგეტიკისა და წყალმომარაგების მარეგულირებელ ეროვნული კომისიის წევრის თანამდებობაზე საქართველოს პარლამენტმა 30 ივნისს დაამტკიცა, სემეკში დღეს წარადგინა.

მაია მელიქიძე თანამშრომლებს სემეკის თავმჯდომარემ ირინა მილორავამ წარადგინა, წარმატებული საქმიანობა და ნაყოფიერი თანამშრომლობის იმედი გამოთქვა.

საქართველოს პრეზიდენტის ადმინისტრაციის უფროსის გიორგი აბაშიშვილის განცხადებით, მაია მელიქიძე მაღალი პროფესიონალიზმითა და დიდი გამოცდილებით კიდევ უფრო დაეხმარება სემეკს გაძლიერებასა და განვითარებაში.

„ელექტროენერგეტიკისა და ბუნებრივი გაზის შესახებ" საქართველოს კანონის შესაბამისად, მაია მელიქიძე კომისიის წევრის თანამდებობას 6 წლის ვადით დაიკავებს.

მაია მელიქიძე 2000-2005 წლებში სწავლობდა საქართველოს ტექნიკური უნივერსიტეტის ჰუმანიტარულ-ტექნიკურ ფაკულტეტზე საერთაშორისო ეკონომიკური სამართლის სპეციალობით, ხოლო 2006-2007 წლებში - ევროპის მენეჯერთა სკოლაში (ESM) ბიზნეს ადმინისტრირების სპეციალობით. 2007 წელს დაამთავრა საერთაშორისო რესპუბლიკური ინსტიტუტის (აშშ) უცხოური ინვესტიციების კურსი.

2015 წელს სწავლობდა ჰარვარდის უნივერსიტეტის (აშშ) ბიზნეს სკოლაში გლობალური სტრატეგიული მართვის სპეციალობით.

შრომითი საქმიანობა დაიწყო 2003 წლიდან „ათასწლეულის გამოწვევა საქართველოს" პროექტის მენეჯერად. 2004 წლიდან 2008 წლამდე მუშაობდა საერთაშორისო კომპანია Ernst & Young-ის უფროს აუდიტორად. 2008-2009 წლებში იყო სს „საქართველოს ბანკის" მთავარი საგადასახადო სპეციალისტი. 2009 წლიდან 2016 წლის 1 მარტამდე მუშაობდა სს „ლიბერთი ბანკის" საქართველოს ეროვნულ ბანკთან და საერთაშორისო აუდიტორთან დაკავშირებული საკითხების კოორდინაციის დეპარტამენტის უფროსად.