მე ჯერ კიდევ მაქვს იმედი, რომ კონსენსუსი შესაძლებელია, - ამის შესახებ პარლამენტის პირველმა ვიცე-სპიკერმა თამარ ჩუგოშვილმა საკონსტიტუციო ცვლილებებზე კონსენსუსის მიღწევის შესაძლებლობაზე დასმული კითხვის საპასუხოდ განაცხადა.

როგორც საპარლამენტო უმრავლესობის წევრმა აღნიშნა, მივიღეთ ვითარება, როდესაც საკონსტიტუციო ცვლილებების შინაარსი არის პოზიტიური, კარგი და სწორი, მაგრამ პოლიტიკური პროცესი, როგორც ხდება ხოლმე საქართველოში ყოველთვის, ძალიან რთულდება და შეთანხმება ძალიან ჭირს განსაკუთრებით პოლიტიკურ აქტორებს შორის.

მისი თქმით, მას იმედი აქვს რომ ჯერ კიდევ არის იმის სივრცე, რომ რამდენიმე თემაზე, იმ ოპოზიციურ პარტიებთან, რომლებსაც რაციონალური მიდგომები გააჩნიათ, საუბარი მოხდეს.

ჩუგოშვილმა აქვე აღნიშნა, რომ "ქართული ოცნება" ბევრ კომპრომისზე წავიდა და კიდევ არის შესაძლებელი შეთანხმებაზე წასვლა.

"მე ჯერ კიდევ მაქვს იმედი, რომ კონსენსუსი შესაძლებელია. თუმცა, დიდი მოლოდინი არ მაქვს, რადგან სრულიად არარაციონალურ ქცევებს ვხედავდით დიდი ხნის განმავლობაში. იყო ისეთი მოთხოვნები, რომლის დაკმაყოფილებაც ფიზიკურად შეუძლებელი იყო და ჩნდებოდა განცდა, რომ ამის მიზანი იყო რომ შეთანხმება ვერ მომხდარიყო. თუ ეს დამოკიდებულება და მიდგომა შეიცვალა, მაშინ შეთანხმება შესაძლებელია. ჩვენ ბევრ კომპრომისზე წავედით და კიდევ შეიძლება წავიდეთ შეთანხმებაზე", - განაცხადა ჩუგოშვილმა.