რაჟდენ შულაიას დაჯგუფების გამოსავლენად FBI-ის ყოფილი პატიმარი დაეხმარა.  New York Times-ის ინფორმაციით, საგამოძიებო დოკუმენტების მიხედვით, ნიუ იორკში, ე.წ. კანონიერი ქურდის რაჟდენ შულაიას დაჯგუფების გამოსავლენად გამოძიების ფედერალურ ბიუროს ინფორმატორი ეხმარებოდა.

ინფორმატორი, რომელიც  გამოძიების მასალებში მოხსენიებულია, როგორც CS-1,  ყოფილი მსჯავრდებულია და აშშ-ში 6-წლიან სასჯელს დაქირავებული მკვლელობის საქმეზე იხდიდა. 

აღნიშნული დანაშაულის დაგეგმვაში კი ჩართული იყო რუსული ორგანიზებულ-დანაშაულებრივი ჯგუფი.

გათავისუფლების შემდეგ, CS-1 გამოძიების ფედერალური ბიუროს ინფორმატორი გახდა, რაშიც მას ფულს უხდიდნენ. ე.წ. კანონიერი ქურდის, რუსეთის მოქალაქე რაჟდენ შულაიას დაჯგუფების წევრებს, რომელთა უმრავლესობა ეთნიკურად ქართველია,ამერიკის შეერთებულ შტატებში წაყენებული აქვთ არაერთი მძიმე ბრალდება, მათ შორის არის შეკვეთილი მკვლელობის დაგეგმვა, ნარკო-ტრეფიკინგი, იარაღისა და სიგარეტის კონტრაბანდა, არალეგალური აზარტული თამაშების ორგანიზება, რეკეტი, ძარცვა, თაღლითობა, ქრთამის მიცემა. 

ბრალდებებში ასევე არის 5 ტონა შოკოლადის ტვირთის ქურდობა, რასაც ამერიკული გამოცემების უმრავლესობა სათაურისთვის იყენებს.

დაკავებულებს შორის არიან  სპორტსმენები ავთანდილ ხურციძე და ლევან მაყაშვილი, რომელტა  პროცესი თბილისის დროით 20:00 საათზე (ნიუ იორკის დროით 12:00 საათზე) დაიწყება. შესაძლოა ისინი თავდებით გაათავისუფლონ.