ირანის საგარეო საქმეთა მინისტრმა მუჰამედ ჯავად ზარიფმა თეირანში მომხდარი ტერაქტების შესახებ აშშ-ის პრეზიდენტის დონალდ ტრამპის განცხადება კრიტიკულად შეაფასა.

დონალდ ტრამპმა ტერაქტთან დაკავშირებით ირანს თანაგრძნობა გამოუცხადა, თუმცა იქვე განაცხადა, რომ ირანი, რომელიც ტერორიზმს აფინანსებს, რისკავს მის მსხვერპლად თავადვე იქცეს.

 „თეთრი სახლის წინააღმდეგობრივი განცხადებები და სენატის სანქციები იმ დროს გაისმა, როდესაც ირანელი ხალხი აშშ-ის სატელიტის მხარდაჭერილ ტერორიზმს შეეჯახა. ირანელები აშშ-ის მხრიდან მსგავს მეგობრულ გარანტიებს ვერ მიიღებენ“, - დაწერა ზარიფმა Twitter-ში.

ოთხმა პირმა, რომლებიც ქალის ტანსაცმელში იყვნენ ჩაცმულნი, ირანის პარლამენტში ცეცხლი გუშინ გახსნა, მოგვიანებით ერთ-ერთმა მათგანმა თავი აიფეთქა.

ირანის შსს-მ ასევე დაადასტურა ერთ-ერთი თავდამსხმელის ლიკვიდაციის ფაქტი. ტერორისტების სამიზნე გახდა იმამ ჰომეინის მავზოლეუმი - ერთ-ერთმა თავდამსხმელმა ასაფეთქებელი მოწყობილობა აამოქმედა.

ძალოვანებმა მავზოლეუმთან ორი თავდამსხმელი დააკავა. ტერაქტების შედეგად 13 ადამიანი დაიღუპა, 43 კი დაშავდა.