სოფელ ხანდოსხევთან აქცია პოლიციასთან დაპირისპირებაში გადაიზარდა. მდგომარეობა მას შემდეგ დაიძაბა, რაც ადგილზე მობილიზებული სამშენებლო ტექნიკის სხვა ადგილზე გაყვანას ცდილობდნენ. აქციის ერთ-ერთმა მონაწილემ ტრაქტორს ქვა ესროლა და შუშა ჩაამტვრია. რის შემდეგაც სამართალდამცავებმა აქციის რამდენიმე მონაწილე დააკავეს. 

ფიზიკური დაპირისპირების დროს ერთი ადგილობრივი დაშავდა, მას სავარაუდოდ ხელი აქვს მოტეხილი. 

ხანდოს ხეობაში საპროტესტო აქცია დილიდან მიმდინარეობს. ადგილობრივები ცდილობენ ხელი შეუშალონ სპეცტექნიკას, რომელიც მაღალი ძაბვის ელექტროგადამცემი ხაზის მშენებლობისთვის მიიყვანეს.

მოსახლეობის განცხადებით, აღნიშნული ხაზი მიმდებარე ტერიტორიაზე ეკოლოგიურ კატასტროფას გამოიწვევს და საფრთხეს შეუქმნის მათ საცხოვრებელ ტერიტორიას.

კომპანია “ენერგოტრანსში” კი აცხადებენ, რომ 500 კილოვატიანი გადამცემი ხაზის მშენებლობა ჯერ არ დაწყებულა, ხოლო გარემოსთვის მიყენებული ზიანი მინიმალური იქნება.