რამდენიმე პროექტის გამარჯვებული, წარჩინებული სტუდენტი. გოგონა, რომელმაც ბევრს მიაღწია და ბევრს მიაღწევს, იმიტომ რომ მან იცის რა უნდა და როგორ გაიკვალოს გზა ცხოვრების ლაბირინთში. ის მომავალი დიპლომატია, ის საქართველოს მომავალია, ისევე როგორც მისი კურსელები.

მოკლედ, გაიცანით - მარიამ კიკნაძე, საქართველოს ტექნიკური უნივერსიტეტის სამართლისა და საერთაშორისო ურთიერთიობების ფაკულტეტის მეოთხე კურსის სტუდენტი:

_ თბილისის 24-ე საჯარო სკოლის დამთავრების შემდეგ ჩავაბარე ტექნიკურ უნივერსიტეტში. მესამე კურსზე ერასმუსის გაცვილითი პროგრამით წავედი შუა აღმოსავლეთის ტექნიკურ უნივერსიტეტში, სადაც საერთაშორისო ურთიერთობების განხრით ვსწავლობდი. ეს პერიოდი ჩემთვის აღმოჩნდა ძალიან მნიშვნელოვანი, ვისწავლე როგორ გავმკლავებოდი სირთულეებს, შევიძინე ბევრი მეგობარი საერთაშორისო მასშტაბით. ამის შემდეგ მონაწილეობა მივიღე აზერბაიჯანის დიპლომატიურ აკადემიის პროექტში,  სადაც თემა ეხებოდა ქალის უფლებამოსილებას. აზერბაიჯანის შემდეგ ჩავერთე პროექტში, რომელიც იწყებოდა სტამბულში. ოთხდღიანი პროგრამა საგარეო პოლიტიკურ სკოლაში ჩატარდა, საკმაოდ საინტერესოდ ჩაიარა ამ პროექტმა. როდესაც ასეთ პროგრამებში ხარ ჩართული, ხვდები ბევრ ადამიანს, რომელთაგან სწავლობ ბევრს და მათაც ასწავლი არც თუ ისე ცოტას.

_ დიპლომატია ძალიან საინტერესო პროფესიაა, როგორ გესახება საქართველოს ურთიერთობები მეზობელ ქვეყნებთან?

_ მხოლოდ დიპლომატიური ურთიერთობებით უნდა დარეგულირდეს ყველა საკითხი! ძალიან გაგვიადვილდება ურთიერთობები თუ ყველაფერს თავის სახელს დავარქმევთ და  ვიმოქმედებთ ისე, როგორც უძველესი კულტურის ქვეყანას შეჰფერის.

_ როგორი წარმოდგენა აქვთ შენს თანატოლებს საქართველოზე?

_ აქტიურად ადევნებენ თვალს საქართველოში მიმდინარე პროცესებს.  როდესაც ჩადიხარ ამა თუ იმ ქვეყანაში, იქ წარმოადგენ შენს ქვეყანას, როგორც მოიქცევი და რა დოზითაც შეეცდები გააცნო უცხოელებს სამშობლო, ისე გაინცობენ და შეაფასებენ.

_ საინტერესო იქნება შენეული შეფასება საქართველოში მიმდინარე პროცესების შესახებ.

_ მე ვფიქრობ რომ დღეს ჩვენი მთავარი მიზანი უნდა იყოს არ მოხდეს საქართველოდან ახალგაზრდების გადინება. მათი ნიჭი აქ, ადგილზე, უნდა იქნას გამოყენებული. განათლება არის ყველაზე მთავარი, რაც გადაგვარჩენს. ყურადღება უნდა ექცეოდეს ნიჭიერ და განათლებულ ახალგაზრდებს, ისინი უნდა დაასაქმონ და არა, ვთქვათ ნაკლებად მომზადებული ადამიანები საკუთარი წრიდან. ცოტა ხნის წინ დავიწყე „ტვინის გადინება-შემოდინებაზე“ საკონფერენციო თემაზე მუშაობა, ირანის, ეთიოპიის და ინგლისის მაგალითზე. ძალიან მინდა, რომ ჩემი მეგობრები, რომლებიც განათლებულნი და ნიჭიერები არიან, როგორც ამბობენ ხოლმე, ლაბირინთებში არ დაიკარგონ. გაცვლით პროგრამებში ბევრი ნიჭიერი სტუდენტი მონაწილეობს, ძალიან მინდა, რომ შეიქმნას მათთვის პირობები, რათა გაუჩნდეთ სურვილი საზღვარგარეთ მიღებული განათლება, საქართველოში გამოიყენონ.

_ სად გესახება შენი თავი?

_ მინდა დიპლომატიური კუთხით წავიდე, ასევე ადამიანის უფლებათა განხრით მინდა გარკვეული გამოცდილება მივიღო.