ევროკავშირი ყველაფერს აკეთებს იმისათვის, რომ  თურქეთის გაწევრიანებას წინ აღუდგეს. ამის შესახებ  ქვეყნის პრეზიდენტმა რეჯებ ტაიპ ერდოღანმა განაცხადა.

თურქეთსა და ევროკავშირს შორის ურთიერთობა მას შემდეგ გამწვავდა, რაც გერმანიამ და ნიდერლანდებმა თურქ მინისტრებს თანამემამულეებთან შეხვედრის უფლება არ მისცეს. ხელისუფლების წარმომადგენლები თურქი ეროვნების მოსახლეობას საკონსტიტუციო ცვლილებების შესახებ 16 აპრილს დანიშნულ რეფერენდუმთან დაკავშირებით უნდა შეხვედროდნენ.

”არ მივცემთ უფლებას სამ-ხუთ ევროპელ ფაშისტს დაამციროს ჩვენი ქვეყნის სიამაყე და ღირსება. მივმართავ ჩვენს ძმებს ევროპაში, დარჩენილია შვიდი დღე (რეფერენდუმის ვადამდელი კენჭისყრის დასრულებამდე), მიდით და გაეცით პასუხი მათ, ვინც ახდენს ამ ფაშისტურ ზეწოლას. შეხედეთ, რას აკეთებს ევროპელების ნაწილი? ყველა ერთად ქრისტიანები, ათეისტები, მართლმადიდებლები - ყველა ერთად მიდის ვატიკანში. ისინი ერთ ერად იქცნენ და ტყველაფერს აკეთებენ, რათა თურქეთი ევროკავშირში არ შეუშვან”, - განაცხადა ერდორანმა რიზაში გამართულ მიტინგზე.

მისი თქმით, რეფერენდუმის შემდეგ დღის წესრიგში დადგება ევროკავშირში თურქეთის გაწევრიანების შესახებ მოლაპრაკებების მიზანშეწონილობის საკითხი.