,,პოლიტიკური პლატფორმა - ახალი საქართველოს” ლიდერი გიორგი ვაშაძე მიიჩნევს, რომ სამოქალაქო საზოგადოების წარმომადგენლების მიმართვის ხელმომწერებისგან სჭირდება მეტი არგუმენტაცია, თუ რატომ უნდა დაუჭირონ მხარი „ნაციონალურ მოძრაობას“.

მისი თქმით, „ნაციონალური მოძრაობის“ ლიდერებმა ბევრი შეცდომა დაუშვეს.

„ნაციონალური მოძრაობის“ მხარდაჭერა ჩვენს მხარდამჭერებს ვერაფერს შეუცვლის, არც იქნება სწორი და არც დაუჭერენ მხარს. კიდევ ერთი საკითხი, „ნაციონალური მოძრაობა“ საერთოდ არ ასხივებს იმას, რომ ბრძოლას აპირებს მეორე ტურში. სხვა პოლიტიკურ პარტიებზე რომ მიდგა ჯერი, ჯერ შიგნით მოიძიონ ძალები, რამდენად არიან განწყობილი, რომ იბრძოლონ მეორე ტურისთვის. ამას დღეს ვერ ვხედავ და ამიტომაც ვფიქრობ, რომ ჩვენი პოზიცია იქნება ამ საკითხთან დაკავშირებით ნეგატიური. “ნაციონალური მოძრაობის“ მხარდაჭერასთან დაკავშირებით. ამ ეტაპზე ასეა და მზად ვართ, იმ ადამიანებთან დისკუსიისთვის, ვინც ამ ინიციატივით გამოდიან”, - განაცხადა ვაშაძემ.

მისივე თქმით, ისე მიდის პროცესი, რომ „ქართული ოცნება“ აიღებს საკონსტიტუციო უმრავლესობას.

„მახსენდება 2014 წლის თბილისის მერობის არჩევნების მეორე ტური, სადაც 70% აიღო „ქართულმა ოცნებამ“ და დაახლოებით ალბათ მსგავსი შედეგი იქნება. ეს არის ამომრჩევლის გადასაწყვეტი. კიდევ ერთიც მინდა ვთქვა, ის არგუმენტი, რომ ხელისუფლება ერთმა პარტიამ არ უნდა ჩამოაყალიბოს ესეც არასწორია, საკონსტიტუციო უმრავლესობა არ სჭირდება ამას, მთავრობის ჩამოყალიბებას სჭირდება უბრალო უმრავლესობა, რაც გარანტირებულზე უფრო გარანტირებული აქვს „ქართულ ოცნებას”, - განაცხადა გიორგი ვაშაძემ.