ზუგდიდში „ნაციონალური მოძრაობის“ მაჯორიტარობის კანდიდატი სანდრა რულოვსი აცხადებს, რომ დიდი შანსი აქვს, პირველივე ტური მოიგოს და მეორე ტურზე მერე დაფიქრდება.

დღეს „ნაციონალურ მოძრაობაში“ პოლიტსაბჭოს სხდომა გაიმართა, სადაც კენჭისყრით გადაწყდა, რომ პარტია პარლამენტის მანდატებზე უარს არ ამბობს და მეორე ტურშიც მიიღებს მონაწილეობას.

ამასთან,  როგორც რულოვსმა აღნიშნა, თავად პოლიტსაბჭოს წევრი არ არის და, შესაბამისად, კენჭისყრაში მონაწილეობა არ მიუღია.

„ჩემთან ჯერ პირველი ტურია. მოგეხსენებათ, რომ ჯიხაშკარში იყო ძალიან დიდი გაყალბება, იყო ყუთების გატაცების და დამტვრევის ფაქტები, ამიტომ ჯერ ჩემთან დგას პირველი ტური. 22 ოქტომბერს ჩატარდება კვლავ ორ უბანში პირველი ტურის განმეორებით არჩევნები. ჩემ კონკურენტთან მაქვს მცირე სხვაობა,  რა თქმა უნდა, მე არა მჯერა, რომ ეს პატარა სხვაობაც კი იყო. მე ჩემს თავს გამარჯვებულად ვთვლი. მე მგონი, არის დიდი შანსი, რომ მოვიგოთ პირველივე ტურში. მერე დავფიქრდები მეორე ტურზე“,-აღნიშნა რულოვსმა.