ზუგდიდის 30-ე საარჩევნო უბანზე, ხმის მიცემის კაბინაში ათამდე ხელმოწერილი ბიულეტენი იპოვეს, რომლებიც საარჩევნო ყუთში არ იყო ჩაგდებული. „თავისუფალი დემოკრატების" წარმომადგენლის, დათო ქანთარიას თქმით, ამ ყველაფერს თან ე.წ სომხური კარუსელის რისკი ახლავს.

„არსებობს რისკი, რომ რაღაც რაოდენობის ბიულეტენი ასევე გატანილი იყოს. მაქსიმალურად ვცდილობთ მივაქციოთ ამას ყურადღბა. მე თვითონ კაბინაში ბიულეტენები არ მინახავს, მაგრამ ამას კომისიის წევრები და კომისიის თავმჯდომარეც დაგიდასტურებთ“, - აღნიშნა დავით ქანთარიამ.

უბნის კომისიის თავმჯდომარე ნანა ქირია ადასტურებს კაბინაში ბიულეტენების აღმოჩენას. მისი თქმით, მაშინვე გამოიტანა ისინი და გააბათილა, ისე რომ კენჭისყრის პროცედურა არ შეფერხებულა. რაც შეეხება ეჭვს ე.წ სომხური კარუსელის შესახებ, არ ფიქრობს, რომ ეს სინამდვილეს შეესაბამება. 

„არა მგონია, რომ ეს სინამდვილეს შეეფერებოდეს. იმიტომ, რომ დღეს მოვიდა საარჩევნო უბანზე რამდენიმე ღრმად მოხუცი ადამიანი, რომლებმაც გადაწყვიტეს დახმარების გარეშე გაეკეთებინათ არჩევანი“, - განმარტა უბნის კომისიის თავმჯდომარემ.