12-16 სექტემბერს ბათუმი, საქართველოს ისტორიაში პირველ საერთაშორისო საზღვაო ფორუმს მასპინძლობს. საზღვაო ფორუმი საქართველოს პრემიერ-მინისტრმა გიორგი კვირიკაშვილმა გახსნა. დელეგატებს მიესალმა საერთაშორისო საზღვაო ორგანიზაციის (IMO) გენერალური მდივანი კიტაკ ლიმი, საქართველოს ვიცე-პრემიერი დიმიტრი ქუმსიშვილი, აჭარის ა.რ. მთავრობის თავმჯდომარე ზურაბ პატარაძე და საქართველოს გარემოს დაცვის მინისტრი გიგლა აგულაშვილი.

"საქართველოს საზღვაო სექტორში განხორციელდა უმნიშვნელოვანესი ცვლილებები. ჩვენ ძირფესვიანად შევცვალეთ ჩვენი მეზღვაურების განათლებისა და სერტიფიცირების სისტემა. საქართველომ წარმატებით გაიარა საერთაშორისო საზღვაო ორგანიზაციისა და საზღვაო უსაფრთხოების ევროპული სააგენტოს აუდიტორული შემოწმება. ჩვენი საზღვაო ტონაჟი იზრდება მაღალი ხარისხის გემების ხარჯზე. სამომავლოდ საქართველოს მთავრობას აქვს ამბიციური გეგმა, რომელიც გულისხმობს ანაკლიაში ღრმაწყლოვანი პორტის აშენებას პანამაქსის ტიპის გემებისთვის," - აღნიშნა პრემიერ-მინისტრმა და ხაზი გაუსვა საქართველოს ხელისუფლების ძალისხმევას - უზრუნველყოს საქართველოს ზღვებისა და ოკეანეების დაცვის უმაღლესი სტანდარტები.

ბათუმის, როგორც საქართველოს საზღვაო ცენტრის შესახებ ისაუბრა აჭარის ა.რ მთავრობის თავმჯდომარემ ზურაბ პატარაძემ. 

„ჩვენი ქალაქის წარმატება - ინვესტიციების მოზიდვა, სატრანზიტო დერეფნად ქცევა, ტურისტული სექტორის განვითარება თუ სხვა ბევრი წინსვლა მის ზღვისპირა მდებარეობას, სტრატეგიულ მნიშვნელობასა და მიმზიდველობას უკავშირდება. ბათუმის, როგორც ერთგვარი საზღვაო დედაქალაქის მნიშვნელობა წარსულშიც და დღევანდელობაშიც განუზომელია ჩვენი ქვეყნისთვის. საქართველოში 9 000-მდე მეზღვაურია და მათი 95% სწორედ აჭარის მკვიდრია. ეს კი ნიშნავს, რომ ამ სფეროს განვითარება პირდაპირ კავშირშია ქვეყნისა და რეგიონის ეკონომიკურ წინსვლასა და კეთილდღეობასთან, მითუმეტეს დღეს, როცა ცნობილი "აბრეშუმის გზის" აღდგენის პროექტში საზღვაო მიმართულებას უდიდესი მნიშვნელობა ენიჭება". 

 

ფორუმს 40-ზე მეტი ქვეყნიდან 300-მდე დელეგატი ესწრებოდა. მათ შორის საერთაშორისო საფინანსო ინსტიტუტების და საერთაშორისო საზღვაო ინდუსტრიის სახელოვანი წარმომადგენლები. საქართველოს საზღვაო ცენტრში - ბათუმში მიმდინარე საზღვაო ფორუმის მიზანია საერთაშორისო ასპარეზზე საქართველოს ერთ-ერთ მნიშვნელოვან საზღვაო სახელმწიფოდ წარმოჩენა. 

ფორუმის მთავარ თემას წარმოადგენს ''საერთაშორისო ნაოსნობა მსოფლიოსთვის შეუცვლელი ტრანსპორტირების საშუალება'', რომელიც თავის მხრივ ეხმიანება მსოფლიოს საზღვაო სფეროს აქტუალურ თემას. 

საზღვაო სფეროში შეტანილი წვლილისთვის საქართველოს პრემიერ-მინისტრმა გიორგი კვირიკაშვილმა მადლობის სიგელით დააჯილდოვა მალტის ელჩი საერთაშორისო საზღვაო სფეროში კარმენ ვასალო.

საერთაშორისო საზღვაო ფორუმის ფარგლებში გაფორმდა მთავრობათაშორისი ხელშეკრულებები.

პირველი საერთაშორისო საზღვაო ფორუმი ბათუმში, საქართველოს პრემიერ-მინისტრის გიორგი კვირიკაშვილის პატრონაჟით ჩატარდა. ღონისძიების მასპინძელი საქართველოს საზღვაო ტრანსპორტის სააგენტო და ეკონომიკისა და მდგრადი განვითარების სამინისტრო იყო.