გვიან ღამით, თუშეთში, სოფელ დართლოდან ჭეშოსკენ მიმავალი გზიდან „მიცუბიში პაჯეროს“  მარკის ავტომობილი მდინარე ალაზანში გადავარდა. ინფორმაციას ამის შესახებ ,,კახეთის საინფორმაციო ცენტრი“ ავრცელებს. უბედური შემთხვევის შედეგად 21 წლის თემურ გოგოთიძე ადგილზე დაიღუპა, სამი ადამიანი კი დაშავდა. დაშავებულები ვერტმფრენით თბილისში, ღუდუშაურის კლინიკაში გადაიყვანეს. ექიმების თქმით, მათ სიცოცხლეს საფრთხე არ ემუქრება.

თუშეთში გამგებლის წარმომადგენლის ლადო კახოიძის ინფორმაციით, გარდაცვლილიც და დაშავებულებიც თუშები არიან. "ცხედარი გურჯაანის პროზექტურაშია გადატანილი. დაშავებულები კი მრავლობითი მოტეხილობებით და დაჟეჟილობებით თბილისში, ღუდუშაურის კლინიკაში არიან მოთავსებულები", - აღნიშნა კახოიძემ.

მისივე თქმით, თუშეთში სოფლებს შორის დამაკავშირებელი გზები ნორმალურ მდგომარეობაშია და ავტოსატრანსპორტო შემთხვევების მიზეზი ხშირ შემთხვევაში მძღოლების ნასვამ მდგომარეობაში ყოფნა ან ავტომობილის ტექნიკური გაუმართაობა ხდება.

,,კახეთის საინფორმაციო ცენტრის“ ინფორმაციით, ავტოსაგზაო შემთხვევები გზის აღნიშნულ მონაკვეთზე ხშირია. კერძოდ, 6 აგვისტოს, თუშეთის გზაზე, თორღვას აბანოდან 4 კილომეტრში ომალოს მკვიდრი კახა ჩაგაიძე ხევში გადავარდა და დაშავდა. მძღოლი ავტომობილს ნასვამ მდგომარეობაში მყოფი მართავდა.

2014 წლის სექტემბერში, თუშეთის გზაზე, ე.წ.  „ბოთლის წყალთან“ „ტოიოტას“ მარკის ავტომანქანა დიდი სიმაღლიდან ხევში გადავარდა. მანქანაში 4 ადამიანი იჯდა. ოთხივე მათგანი, 21 წლის თემო ბუღრიძე, 38 წლის ბესიკ კიტოშვილი, 39 წლის თევდორე ბუღრიძე და 40 წლის რამაზ აშაძე ადგილზე დაიღუპნენ.

თუშეთთან დამაკავშირებელი  ერთადერთი საავტომობილო გზა თელავის რაიონის სოფელ ფშაველიდან იწყება. სოფელ ომალომდე 72 კილომეტრია. სტორის ხეობიდან აბანოს უღელტეხილამდე საავტომობილო გზის დიდი ნაწილი კლდეებზეა გაჭრილი. გზა მეწყერსაშიშ ზონაშიც გადის.