ხაშურის 35-ე საოლქო საარჩევნო კომისიაში თავმჯდომარემ იმედო ლაცაბიძემ და ,,თავისუფალი დემოკრატების" წარმომადგენელმა დავით მეტრეველმა იჩხუბეს.
იმედო ლაცაბიძისკენ გასროლილი ჭიქა მდივანს ლია პირმისაშვილს მოხვდა.
შინაგან საქმეთა სამინისტრომ გამოძიება სისხლის სამართლის კოდექსის 125-ე მუხლის მიხედვით (ცემა) დაიწყო.
დავით მეტრეველს საოლქოს წარმომადგენლის სტატუსი ჩამოართვეს. იგი ,,თავისუფალი დემოკრატების" წევრია.
ინციდენტი გუშინ მოხდა.
„თათბირი გვქონდა. მეტრეველი ჯერ საოლქოს მდივანს ლია პირმისაშვილს უყვიროდა და შემდეგ მე. რამდენიმე დღის წინ, ის ე.წ. საარჩევნო ბადეს ითხოვდა და ამბობდა, რომ პარტიაში წასაღებად ჭირდებოდა. ჩვენ ავუხსენით, რომ საჯარო ინფორმაციის გამოთხოვასთან დაკავშირებით განცხადება დაეწერა. განცხადება მართლაც დაწერა და პასუხიც მიიღო, თუმცა ცესკოში ჩავიდა და გვიჩივლა, რომ თურმე ინფორმაციას არ ვაძლევდით. ამ საკითხს ეხებოდა ჩვენი საუბარი“ - აცხადებს 35-ე საოლქო კომისიის თავმჯდომარე იმედო ლაცაბიძე.
კამათი მხარეებს შორის სიტყვიერ შეურაცხყოფაში გადაიზარდა. ლაცაბიძე და ლია პირმისაშვილი ყვებიან, რომ დავით მეტრეველმა ჭიქა ისროლა.
,,ჭიქა მესროლა, ავიცილე. ჯერ კედელს მოხვდა და შემდეგ მდივანს" - ამბობს იმედო ლაცაბიძე.
ფაქტს საოლქო კომისიის მდივანი ლია პირმისაშვილი ადასტურებს.
„იმედო ლაცაბიძე მოგიყვებათ უკეთესად, რაც მოხდა. ჩვენ მაშინვე პოლიცია გამოვიძახეთ, მოვიდნენ, ჩვენებები ჩამოგვართვეს და შედგა ოქმი. გამოძიება მიმდინარეობს“ - გვითხრა ოლქის მდივანმა ლია პირმისაშვილმა.
შიდა ქართლის საინფორმაციო ცენტრი ,,თავისუფალი დემოკრატების" ხაშურის ორგანიზაციის წარმომადგენლებს დაუკავშირდა.
მაჟორიტარი დეპუტატობის კანდიდატი დიანა გელაშვილი აცხადებს, რომ დავით მეტრეველი საოლქო კომისიის წევრობიდან მოიხსნა და პარტიის სახელით ვეღარ ისარგებლებს. დავით მეტრეველთან დაკავშირება ჯერჯერობით ვერ მოხერხდა.
საქმეზე გამოძიება შინაგან საქმეთა სამინისტრომ სისხლის სამართლის კოდექსის 125-ე ცემის ფაქტზე უკვე დაიწყო.

წყარო www.qartli.ge