მუხრან ბურჭულაძემ სახელმწიფო გადატრიალების ფაქტზე გამოძიების დაწყება მოითხოვა

საქართველო, თბილისი - 15:38 | 17.05.2016

ნანახია: 1723

მუხრან ბურჭულაძემ პროკურატურას განცხადებით მიმართა და 1991-92 წლების სახელმწიფო გადატრიალების ფაქტზე გამოძიების დაწყება მოითხოვა.

მან ასევე განმარტა თუ რატომ ყოვნდება პრეზიდენტი გამსახურდიას მკვლელობის საქმის გამოძიება, მოითხოვა მთავარ პროკურორთან შეხვედრა, საქმეზე მისი განმარტება და გამოძიების ბოლომდე მიყვანა. როგორც პარტია ლიბერალ დემოკრატების ლიდერმა განაცხადა, 1991-92 წლების „სახელმწიფო გადატრიალებად“ ცნობილი აქტი არის კრემლის სპეცოპერაცია თავისუფალი საქართველოს წინააღმდეგ, რომელიც აწარმოა რუსეთის ფედერაციამ და მასში მონაწილე პირები დღეს ქართულ პოლიტიკას აწარმოებენ.

„მე დაგპირდით დიდ ლუსტრაციას რასაც ვაკეთებ კიდეც. ეს არის დიდი მხილებისა და ეროვნული თანხმობის დასაწყისი. სახელმწიფო გადატრიალება გახლდათ რუსეთის აგრესია თავისუფალი საქართველოს წინააღმდეგ, ეს იყო კრემლის სადამსჯელო სპეცოპერაცია, რომელშიც მონაწილე ვაიქართველები დღემდე მართავენ სახელმწიფოს და რჩებიან პოლიტიკაში. სამართალი ვერ იზეიმებს სანამ სახელმწიფოს დამაქცევრები არ აგებენ პასუხს კანონის და ერის წინაშე. საქართველო ვერ შედგება განვითარების გზაზე ამ საქმის გამოძიების გარეშე. შემთხვევითი არაა, რომ დღემდე არავის გამოუძიებია სახელმწიფო გადატრიალება და პრეზიდენტის მკვლელობა. ჩვენ ვიცით ვისია დაკვეთა და ვინ არის შემსრულებელი, თუმცა ამას არა დეპუტატი არამედ ორგანოები უნდა იძიებდნენ. მოვითხოვ სისხლის სამართლის საქმის აღძვრას რუსეთის ფედერაციის აგრესიის თაობაზე და დამნაშავე პირების პასუხისგებაში მიცემას ასევე საქართველოს პრეზიდენტის ზვიად გამსახურდიას მკვლელობის დაუყოვნებლივ გამოძიებას. ხელისუფლებაში მოსვლის დღიდანვე ჩვენი გუნდი დაუყოვნებლივ გამოიძიებს სახელმწიფო გადატრიალებას და პრეზიდენტის მკვლელებს მისცემს პასუხისგებაში, ამით საფუძველს ჩავუყრით ჩვენი ხალხის ერთობას და წინსვლას. ქართველებმა უნდა იცოდნენ ვინ დაამხო ქვეყანა და ვინ მოუკლა პრეზიდენტი, ეს ეროვნული ღირსების საკითხია. ყველა ტელევიზიისთვის ცნობილი გახლდათ, მაგრამ დღეს არცერთ მაუწყებელს არ გაუშუქებია ეს საკითხი რადგან მათ ინტერესში ალბათ უფრო მნიშვნელოვანი თემები შედის“ - აცხადებს მუხრან ბურჭულაძე.