თინა ხიდაშელი: ინტენსიური კომუნიკაცია გვაქვს სომხეთთანაც და აზერბაიჯანთანაც

თავდაცვის მინისტრმის თინა ხიდაშელის განცხადებით, ქართულ მხარეს ინტენსიური კომუნიკაცია აქვს სომხეთთანაც და აზერბაიჯანთანაც.

„ამ სამი დღის განმავლობაში საქართველოს თავდაცვის სამინისტრო ყველა დონეზე მუდმივ კომუნიკაციაშია.  გუშინ გავრცელდა ინფორმაცია ჩემი და სომხეთის თავდაცვის მინისტრის საუბრის შესახებ, დღეს უნდა ვესაუბრო აზერბაიჯანის თავდაცვის მინისტრს“,- აღნიშნა საქართველოს თავდაცვის მინისტრმა.

მისივე თქით, საქართველოს პრემიერმა უკვე გამოხატა ქართული სახელმწიფოს პოზიცია,  რომელიც თანხვედრაშია ჩვენი პარტნიორების პოზიციებთან.

„როდესაც სროლებია ირგვლივ, როდესაც დაძაბულობა ამ მასშტაბს აღწევს,რაც ჩვენ მთიანი ყარაბაღის პირობებში ვნახეთ, მთავარი ამოცანაა,  შეწყდეს ცეცხლი. ამის შემდეგ შეიძლება, გაგრძელდეს საუბარი ყველაფერ დანარჩენზე.დიდი იმედი მაქვს,  ვენაში დაგეგმილი შეხვედრა შედეგიანი აღმოჩნდება, სულ მცირე ცეცხლის შეწყვეტის მხრივ“,-განაცხადა თინა ხიდაშელმა. 

გაეროს მონაცემებით, ბოლო 3 დღის განმავლობაში, მთიან ყარაბაღში შეიარაღებული დაპირისპირების შედეგად დაიღუპა 33 და დაშავდა 200-ზე მეტი ადამიანი.