„დიო“ ბავშვთა პირველი პალიატიური მზრუნველობის ცენტრის კარ-ფანჯრებით, ტენტებითა და ჟალუზებით აღჭურვას უზრუნველყოფს

დღეს, 31 მარტს, 19:00 საათზე კომპანია „დიო“ სასტუმრო „თბილისი მარიოტში“ გამართულ შეხვედრაზე დაარსებიდან 20 წლის საქმიანობის შედეგებს შეაჯამებს და კომპანიის ახალი სოციალური ინიციატივის შესახებ გამოაცხადებს.

 „დიო“-მ საკუთარ თავზე აიღო თბილისში ბავშვებისათვის პირველი პალიატიური მზრუნველობის ცენტრის (ჰოსპისის) შენობის კარ-ფანჯრებით, ტენტებითა და ჟალუზებით აღჭურვა.

ბავშვთა ჰოსპისის მშენებლობა 2015 წელს ფონდი „ღია საზოგადოება“-ს ინიციატივით დაიწყო. შენობა ქართული ბიზნეს კომპანიებისა და მოქალაქეების შემოწირულობებით აშენდება, ხოლო მის შემდგომ ფუნქციონირებაზე ზრუნვას ფონდი „ღია საზოგადოება“ გააგრძელებს სხვა დონორებთან ერთად. პროექტის მხარდამჭერია საქართველოს პრეზიდენტი და სამედიცინო კორპორაცია „ევექსი“. ბავშვებისა და მათი ოჯახებისთვის მომსახურება უფასო იქნება.

ბავშვთა პალიატიური მზრუნველობა გულისხმობს უკურნებელი სენით დაავადებულ ბავშვებზე და მათ ოჯახის წევრებზე ზრუნვას.  პალიატიური მზრუნველობის მიზნებია პაციენტთათვის ტკივილის შემსუბუქება და სიცოცხლის ხარისხის გაუმჯობესება.