მოწყვლადი ჯგუფების სტომატოლოგიური და ორთოპედიული მომსახურება ბათუმის მერიას 75 000 ლარი უჯდება

საქართველო, თბილისი - 17:02 | 18.03.2016

ნანახია: 1471

ქალაქ ბათუმის მერია მოწყვლადი ჯგუფების სტომატოლოგიური და ორთოპედიული მომსახურების პროგრამას ახორციელებს, რომლის ფარგლებშიც ბენეფიციარებს გაეწევათ სტომატოლოგიური, ორთოდონტიული და ორთოპედიული მომსახურება.
როგორც ბათუმის მერიაში განმარტავენ, პროგრამით ისარგებლებენ ქ. ბათუმის მერიის უფასო მუნიციპალური სასადილოების 57 000-მდე სარეიტინგო ქულის მქონე და ნავთობგადამამუშავებელი ტერმინალის უფასო სასადილოს 300 ბენეფიციარი და 18 წლამდე ასაკის შ.შ.მ. სტატუსის მქონე 50-მდე ბავშვი.
ბათუმის მერიის ჯანმრთელობისა და სოციალური დაცვის სამსახურის უფროსის მოადგილის, მარინა რუხაძის განცხადებით, 2016 წლისათვის მერიაში შემოსული განცხადებების საფუძველზე, პროგრამას შეზღუდული შესაძლებლობის სტატუსის მქონე ბავშვებიც დაემატა და მოუწოდებს მათ მიმართონ ბათუმის მერიას და ჩაერთონ პროგრამაში.
ამ ეტაპზე პროგრამით 100-მდე ბენეფიციარი სარგებლობს, რომელთაგან 70 პაციენტს უკვე გაეწია სტომატოლოგიური მომსახურება.
პროგრამის განხორციელებისათვის ბათუმის მერიის ბიუჯეტიდან გამოიყო 75 000 ლარი.