სავარაუდო კანიბალიზმის შემთხვევა - სანზონაში, ბინაში გახრწნილი ხორცი აღმოაჩინეს, დაწყებულია გამოძიება

პოლიციამ სანზონაში დალუქა ბინა, რომელშიც გახრწნილი ხორცი და ფეკალიებით სავსე კონტეინერები აღმოაჩინეს - ამის შესახებ ინფორმაციას "ფორმულა" ავრცელებს.

ადგილობრივებმა სამართალდამცველები მას შემდეგ გამოიძახეს, რაც მეზობლები ბინიდან უსიამოვნო სუნმა შეაწუხა. გაუსაძლისს სუნს მეზობლები რამდენიმე თვის განმავლობაში გრძნობდნენ.

"ფორმულას" ინფორმაციით, მეზობლები ამბობენ, რომ ქალმა პოლიციას კარი არ გაუღო, რის შემდეგაც ისინი სახლში ძალისმიერი მეთოდით შევიდნენ.

„ქალი პარკებში ინახავდა ხორცს, რომელსაც მატლები ესეოდა. კონტეინერები იყო სავსე სხვადასხვა სითხითა და ფეკალიებით. საშინელი ანტისანიტარია. ხორცი ექსპერტიზაზე წაიღეს. ექსპერტიზის პასუხის შემდეგ გაირკვევა, რა წარმოშობისაა ხორცი. ქალი ექიმი-თერაპევტია. მუშაობს. მისთვის აქამდე უცნაური არაფერი შეგვიმჩნევია“, - ყვება ერთ-ერთი მეზობელი.

მეზობლების თქმით, უსიამოვნო სუნი მათ უკვე თვეებია აწუხებთ. 18 ივნისს კი მას შემდეგ, რაც ბინიდან გამოსული სუნი გაუსაძლისი გახდა, მათ სამართალდამცავები გამოიძახეს.

შინაგან საქმეთა სამინისტრომ ფორმულას უთხრეს, რომ ხორცი ექსპერტიზაზე გადაიტანეს. მათი თქმით, დაწყებულია გამოძიება. ქალი, რომელიც ბინაში ცხოვრობს სამართალდამცველებმა გამოკითხეს.