ჯაჭვლიანმა რელიგიური ნიშნით შეურაცხყოფის დასჯაზე უარი თქვა

საპარლამენტო უმრავლესობის წარმომადგენელმა, სოსო ჯაჭვლიანმა, რელიგიური ნიშნით შეურაცხყოფის დასჯაზე უარი თქვა და მის მიერ მომზადებული კანონპროექტი, "ადმინისტრაციულ სამართალდარღვევათა კოდექსში ცვლილებების შეტანის თაობაზე", პარლამენტიდან გაიწვია.

ამის შესახებ დღეს  პარლამენტის ბიუროს სხდომაზე გახდა ცნობილი.

"ეს არის კანონპროექტი, რომელშიც საუბარი იყო რელიგიური გრძნობების შეურაცხყოფისთვის ადმინისტრაციული სახდელების თაობაზე. ეს პროექტი ჯერ კიდევ საკომიტეტო განხილვების სტადიაშია, ამიტომ ავტორს და ინიციატორს აქვს ამის უფლება. ასე რომ, ჩვენ მივიღეთ ცნობად, რომ ბატონმა იოსებ ჯაჭვლიანმა გაითხოვა აღნიშნული პროექტი. შესაბამისად, პარლამენტი წყვეტს ამ საკითხზე მსჯელობას," - განაცხადა დავით უსუფაშვილმა.

სოსო ჯაჭვლიანმა რელიგიური ნიშნით შეურაცხყოფისთვის ფულადი ჯარიმების დაწესებას ითხოვდა, რამაც საზოგადოების პროტესტი გამოიწივია იმის გამო, რომ ეს ინიციატივა ადამიანის ფუნდამენტურ უფლებებს ეწინააღმდეგებოდა.