სალმა ჰაიეკის თქმით, ვაინშტაინი მას მოკვლით ემუქრებოდა

მსახიობი სალმა ჰაიეკი აცხადებს, რომ ჰოლივუდის პროდიუსერი ჰარვი ვაინშტაინი მას სექსუალურად ავიწროებდა და და უარის შემთხვევაში მოკვლით ემუქრებოდა.

გაზეთ New York Times-ის სვეტში ჰაიეკი წერს, რომ ერთხელ ვაინშტაინმა უთხრა: „მოგკლავ, ეჭვი არ შეგეპაროს, რომ ამას შევძლებ“.

მსახიობი ამბობს, რომ დიდი ხნის განმავლობაში დუმდა, რადგან ფიქრობდა, რომ მისი აღიარება არაფერს შეცვლიდა და მისი ხმა უყურადღებოდ დარჩებოდა.

„ჩვენ ბოლოსდაბოლოს ვაცნობიერებთ იმ ბოროტებას, რომელიც მიღებული იყო ჩვენს საზოგადოებაში და რომელიც ამცირებდა და შეურაცხყოფდა მილიონობით ისეთ გოგონას, როგორიც მე ვარ. რადგან ყოველ ქალში გოგონაა“, - ამბობს ჰაიეკი.

ვაინშტაინის წარმომადგენელი ჰოლი ბეირდი ამტკიცებს, რომ მსახიობის განცხადება სადაოა.

შეგახსენებთ, რომ 35-მდე ქალმა, მათ შორის მსახიობებმა როუზ მაკგოუენმა, ანჯელინა ჯოლიმ და გვინეთ პელტროუმ ჰარვი ვაინშტაინი სექსუალურ შევიწროებაში დაადანაშაულა.